Footer

Addanto latta ti abagak a pagsadagam, best friend

Sarita ni Judith M. Simon

(Maikatlo a paset)

 

“Friend,” kinunam iti naminsan, “awan siled ti adda sagubanitna iti pagtaengan a binangonko. Adu a sao ti malak-ammo no dika makatrabaho iti aglawlaw. Kunak idi no naragsakakon ta adda payen impatakderko a balay. Ngem saan! Masapul nga agtrabahoka nupay kasano ti panniitmo.”

“Kabaelam ngarud?” inamadko idi.

“Ad-adda nga agsakitak – nga agsakit ti barukongko – no makangegak kadagiti agkakasakit a sao. Diak ammo ngem naglaka a maapektaran ti barukongko no kasta a makangngegak iti sao. Saan met idi diak pay nangasawa. Diak met ngarud kayat a pabasolen ni baket. Siguro, kastoy ti gasatko. Ti salun-atko a naited…” Nakitak la unay ti panagarimasa dagiti matam.

Addata kadayta a kanito iti suli ti library. Naimbag ta awan pay dagiti ubbing nga ag-research. Nakitadaka koman a makasangsangit!

Inay-ayka. Ngem ania ngarud ti maaramidak? Natdaak laengen a dimngeg kadagiti istoriam ta isu pay a pakalag-anam.

Sakbayna, nasdaawak iti text-mo iti maysa nga agsapa. Kunam: “Umas-asuk ti kape, makasinit ti innapuy, agal-alingasaw ti kaldo ditoy lamisaan. Ngem apay a no ramanak ket kasla kalam-ek ti agsapa iti bulan ti Disiembre?”

Ania met ti iteteksnan, kinunkunak iti bagik. Mangrugi manen ti kinamannaniwna!

Ngem iti panaglabas dagiti aldaw, nasirokko met laeng ti kayatmo a sawen. Adda gayamen anay a mangrugin a mangrunot iti pundasion ti binangonmo a pagtaengan.

Malagipko la unay daydi panaglanganmo iti dua a lawas. Katengngaan idi ti bulan ti Hulio. Dida ngamin kayat nga iruar ti nabatbati a sueldom iti napalabas nga school year. Masapulmo la unay ta adda gurigor ti anakyo.

Nagbalaw ti prinsipal ket indanonna iti administrasion ti inaramidmo. Ngem imbes a kapungtotnaka ti administrasion, pinaayabandaka ketdi ket kinasaritadaka. Intedda ti kasapulam. Ngem ti dakesna, parsiak laeng no idilig iti dawdawatem. Ti kayatmo, alaem amin a nabati a sueldom. Ngem ania ngarud ket inrasonda nga awan kuarta ti eskuela.

Kunam, irasonmo koma nga adda metten naawat ti pagadalan a bayad ti gobierno kadagiti ubbing iti napalabas a tawen ngem dika naikkan iti gundaway. Awan intedda a panawenmo nga agsao. Sa idi agnadnad ti ngiwatda, nagpakadada a dagus kenka ta adda pay papananda. Nga adu pay ti rumbeng nga asikasuenda.

Kanayon a kastada!

Nupay inkarim a dikan agsubli nga agisuro no dida ited amin nga irengrengrengmo, nagari met laeng ti asim kadagiti ubbing.

Dita manen nga inungtannaka ni baketmo. Dina maawatan ti riknam kadagiti estudiante. Ti kinapategda kenka. Ti sinapataam a pagrebbengan.

Nasakit ti nakemmo gapu itoy.

Nagbalinak manen nga abaga a nagsadagam. Diak ammo iti bagik ta kasla marikriknak met ti sakit a sagsagabaem. Ngem asinoak, ‘ya, a makibibiang iti parikutyo nga agassawa?

Adda dagidi rabii a malukagak kadagiti mensahem. Anian, ta uray adalemen ti rabii di pay laeng agsardeng ni baketmo a mangpaspasakit kenka. Nagbassitan a banag, padakkelenna pay. Dinaka la mariing a dagus a mangpagatas iti anakyo, ta nabannogka a nagisuro, adda ditan dagiti sao nga ala-bala ti masinggan a rummuar iti ngiwatna.

Diak ammo no rumbeng nga ibagam pay dagidiay a susikyo nga agassawa. Kinunkunak lattan iti bagik a kasapulam ti pangipeksaam iti marikriknam. Ti gayyem a sindadaan a dumngeg kadagiti an-anek-ekem.

Ket iti panaglabas dagiti aldaw, sabalin ti marikriknak kenka. Saanen a basta gayyem lattan. Wen, rimmusing ti ayat ditoy barukongko nga agpaay kenka. Ammok, di rumbeng ngem diak met maisuro ti pusok.

DIAK simrek kadayta a malem ta agsakit ti ulok. Agbasbasaak iti libro idi matugtog ti ridaw. Agmaymaysaak iti kaserak ket diak ammo no asino ti dumteng a bisitak. Adda iti pagadalan ti kakaseraak nga estudiante idinto a napan nagtrabaho ti maysa a kaduami.

Naklaatak laengen idi mailukatko ti ridaw ti kaserami. Sika ti naibaskag. Madlaw ti ulep a nanglangeb kadagiti matam.

“A-adda kadi nauneg a problemam?  sinaludsodko idinto a pinastrekka.

Impusotmo ti bagim iti sopa. Immangeska iti nauneg saka nagkidem. Nagtugawak iti abaymo.

“I-ibagam koma bareng makatulongak,” nakunak ket piniselko ti imam.

“D-diakon makaibtur pay…” nakunam. Nariknak ti nakaro a liday iti bosesmo. Kasla baklaymo ti dagsen ti lubong.

Diak idi maawatan ti riknak ta kayatka nga arakupen. Nga iparikna ti kinapategmo kaniak. Ta ammok latta idin a dakkel manen ti dagensen nga ibakbaklaymo.

Ngem nagteppelak. Saan a mabalin a siak pay ti mangipakita iti panaggustona kenka. Ti panagayatko, kunak man laengen. Sa maysa pay, addan pamiliam.

(Maituloyto)