Footer

Addanto latta ti abagak a pagsadagam, best friend

Sarita ni Judith M. Simon

(Maikapat a paset)

 

Insalaysaymo ti napasamak. Itay mapanka agbasa, pinasagidannaka manen ni baketmo gapu iti awan a pagdur-asan ti panagbiagyo. Naim-imbag la kano koman a diay binastedna ti nagbalin nga asawana.  Simmangpet ngamin daytoy a naggapu iti abrod. Dakkel ti sapulna. Nakaipatakder payen iti dakkel a balayna iti kabesera.

“Ar-aramidek amin a kabaelak tapno maitedko amin a kasapulanna iti biag. Uray in-inut, nakabakirkami metten kadagiti alikamenmi. Adda metten bassit nga iduldulinko para kadagiti annakmi. Ngem bale awan dagitoy kenkuana. Iti imatangna, maysaak nga awan ti serserbina nga asawa…”

Iti dayta a darikmat, awan ti masapulak a balikas a pangandingay kenka.

“Diak ammo ti aramidek tapno maalak ti pammatina kaniak…” nakunam.

Nawagwag ti abagam.   Naluyaannak idi makitak ti panagregreg dagiti luam. Diak napupuotan ti bagik ket inaprosak ti likudmo ken pinispiselko ti maysa a dakulapmo. Inarakupka ket binay-ak a nagsadag ti ulom iti abagak. Naidennes ti bagik kenka. Nagkintayegak idinto a nagkarayam ti bara iti sibubukel a kinataok.

Inyangadmo ti rupam sanak pinerreng. Agbalbalikas dagiti matam, diak ammo no ania ti ipapaawatda ngem iti dayta a kanito, mariknak a dandanin marunaw ti nabatbati pay a pigsak.

Nagpinnerrengta. In-inuten a nayanud ti riknak. Inarakupka ket iti panaglantip ti bagita, nagtalukatik ti naidumduma a rikna iti nagbaetanta.

Sinapul ti bibigmo ti bibigko. Nasarakak laengen ti bagik nga immarakup kenka iti nakair-irut idinto a naganangsabak iti bara ti agekmo.

Ngem sakbay a nagungtoban ti apuy iti nagbaetanta, rimkuaska a kasla nasibugan iti sangatimba a danum.

“S-Saan a rumbeng daytoy…” kinunam.

“J-Joe…” kasla nausawannak met.

“P-pakawanennak ta nalipatak ti bagik…”

“A-awan ti rumbeng nga ipakawanam…. uray siak ket nalipatak ti bagik,” nakunak.

Immangeska iti nauneg saka timmakder.

“Agyamanak iti kaaddam, best friend. Dakkel ti naitultulongmo kaniak. Addaka a pangibagbagaak kadagiti parikutko. Naimbagka a gayyem.”

Piniselmo ti imak ket iti ipapanawmo, inkuyogmo ti lulem ti lubong.

“Sabalika, Joe…” naitanamitimko. Ngem iti kaunggak, nanayonan manen ti panagraemko kenka. Nupay lemlemmesennaka ti dagensen, saanmo nga intulok a pinailayus ti riknam. No sabali la a tao, diak la ammon no dinak ginundawayan!

Ammok no kasano kasaem dagiti mapaspasaram. Ta asino met a mannurat ti maragsakan no ti pay mismo a kameng ti pamiliana ti mangumsi kenkuana? Ti di mangipateg kadagiti gapuananna?

Imbatadmo iti text a kalasugam la gayam ti kinaangawmo ken dagiti pagkakatawaan nga ipatpatulodmo tapno lumag-an met ti marikriknam a dagensen a sangpetam no kasta nga aggapuka iti pagadalam. Saan a pudno a naragsakka. A maiduma iti makitkitami a kinaisemmo no kasta idi a sumrekka.

Natibkerka iti sulisog! Wen, aklonek, maysaak a sulisog. Kasla nagbassitan ti panagkitak iti bagik idi makalikudka. Nagsangsangitak.

Natan-okka, Joe, dayta ti sinangkadagullitko. Makasapulak koma met iti kas kenka. Ta kadagidi a kanito, nanglangeb metten ti relasionmi iti nobiok. Adukami iti pusona!

Kabigatanna, kasla awan napasamak iti nagbaetanta. Nagtultuloy ti kinasingedta.

SAKBAY a nagrikep ti klase kadaydi a tawen, napagpungtotmo ti prinsipal. Ta kasano, nairaman iti listaan dagiti agturpos dagiti imbagsakmo. Iti regulasion, di agturpos dagiti nabagsak iti dua a units.

Impettengmo a dimo kayat dayta a mapaspasamak. Ta anianto la ti kunan dagiti kaklaseda. Agturposda, a, ta nagbayadda! Dayta la unay ti kaguram!

Ngem awan ti naaramidam ta iggem ni Ma’am dagiti record. Mabalinna latta nga i-release ti grado ti ubing inton kasapulan daytoy dagiti papelna para iti panagkolehiona. Napaneknekam a nabayag gayamen dayta a kalakaran.

Adu dagiti nakasaritam a nagkuna nga agbayadda gayam kadagiti agpirma kadagiti papelda ken adu pay ti ibaga dagitoy nga idonarda. Kapit sa patalim dagitoy ta dida kayat ti ag-repeater!

Dayta ti makagapu a nagikkatka iti pagadalan. Indanonmo iti ngato ti mapaspasamak iti NQHS ngem awan nagbanaganna. Maimpluwensia ti akinkukua ti pagadalan ta maysa a politiko.

“Ammok itan no apay nga agtultuloy ti panagsuek ti kalidad ti edukasion ditoy eskuelatayo,” kinunam.

(Maigibusto)