Adres ti balasang ramut pannakabagsol ti baro

NARVACAN, Ilocos Sur – Nabagsol ti maysa a baro gapu laeng iti riri a nagramut iti saanna a pannakaala iti adres ti maysa a balasang sadiay Barangay San Pablo ditoy nga ili idi malem ti Hulio 16.

Binagsol ni Neil Ross Ladiero y Ancheta, 15, baro, out of school youth, ken residente iti Barangay Bantugo, Nagbukel, Ilocos Sur ni Samuel Cachola y Ardona, 19, baro, awanan panggedan ken residente iti Barangay San Pablo ditoy.

Segun iti report, dinanog ni Cachola iti sumagmamano a daras ni Ladiero gapu ta di kayat daytoy nga ited ti adres ti balasang a mapapati a pagduyosanna. Inasut met ti suspek ti imukona sana binagsol ti biktima a nagsagrapan daytoy iti sugat iti babaen ti akinkannigid a kilikilina.

Naipaagas ni Cachola iti Central Ilocos Sur District Hospital, Narvacan sa naiyalis iti Gabriela Silang General Hospital iti Vigan City.

Simmuko a boluntario ti Ladiero kadagiti nagresponde a polis ket naipan iti police station agraman ti patadem a pinangbagsolna iti biktima.#