Banner News: Adu a supply ti dara iti PNRC Ilocos Sur, pinasingkedan ti Provincial Administrator | Tawid News Magazine - Weekly Ilocos News 📰

Adu a supply ti dara iti PNRC Ilocos Sur, pinasingkedan ti Provincial Administrator

VIGAN CITY — Gapu iti kaadu dagiti naayat nga umili nga agdonar iti dara, adun ti supply iti Philippine National Red Cross iti Ilocos Sur, ken libre daytoy a maipaay kadagiti napanglaw, ngem adda service fee para kadagiti makabael nga agbayad.

Dayta ti pinasingkedan ni Ms. Veronica Tactay, Provincial Administrator ti Philippine National Red Cross iti Ilocos Sur kabayatan ti pannakiumanna iti media iti naangay a Dap-ayan iti Amianan Media Forum iti opisina ti Philippine Information Agency, Provincial Capitol idi malem ti Nob. 14, 2019.

Impakaammona nga iti daytoy a panawen nga adu dagiti nabiktima iti sakit a dengue nga agkasapulan iti dara, ken kadagiti ag-dialysis, maopera, blood transfusion ken dadduma pay a makasapul iti dara a taga-Ilocos Sur ket awan ti pagdanaganda gapu ta adu ti supply ti dara iti PNRC blood bank.

Inlawlawagna a kangrunaan a requirement ti PNRC kadagiti agkasapulan ket ti kompleto ken detalyedo a doctor’s request para iti kasapulan a blood type ken kaadu ti dara. Inlawlawagna pay a ti dara ket libre ken dagiti indigents wenno dagiti napanglaw ket kasapulan ti pammaneknek iti kasasaadda tapno saanda nga agbayad iti service fee.

Impakaammo ni Ms. Tactay a napili ti PNRC Ilocos Sur a Top 20 kadagiti nasurok a 100 a PNRC chapters iti intero a Pilipinas gapu iti nasayaat a serbisio nga ipapaayda kadagiti agkasapulan iti tulong iti nagduduma a pakaseknan kas iti blood bank, disaster rescue and relief operations, first aid ken dadduma a serbisio.

Inlawlawagna a ti Red Cross ket maysa nga independent international humanitarian organization a madadaan a tumulong iti panawen ti kappia, kalamidad ken riribuk. Iti Pilipinas ket idauluan ni Sen. Richard Gordon kas chairman, ken addaan iti nasurok a maysa a million a volunteers.

Inyawisna pay iti publiko ti angayen ti PNRC ti simultaneous nationwide fun run iti nagduduma a lugar iti Pilipinas inton parbangon ti Disiembre 8, 2019 a panggepna ti mangurnong iti maysa a million runners a mangted iti donasion para ti fund raising ti PNRC a pangsuporta kadagiti programada.

Impakaammona nga iti Ilocos Sur ket rantada ti mangurnong iti 25,000 a runners ket namnamaenna ti suporta ti Provincial Government, dagiti lokal a gobierno, non-government organizations ken dagiti pribado a tattao a makikaysa iti fun run.

Impeksa pay ti PNRC provincial administrator ti panagyamanna kadagiti amin a blood donors ken dagiti partners-da a local government units ken NGO ta babaen ti suportada ket saanen a problema ti panagkasapulan iti dara. Impakaammona pay a madadaan ti PNRC Ilocos Sur a mangisayangkat iti libre a first aid training iti grupo dagiti naurnong a 25 a tattao a mayat nga agbalin a volunteers ken makasursuro iti first aid. ●