Adventure Zone, naluktan iti Ilocos Sur

BANTAY, Ilocos Sur – Mapadasan met itan dagiti taga-Ilocos Sur dagiti extreme sports nga iti laeng dadakkel a resort iti sabali a probinsia ti pakasarakan. Daytoy ket kalpasan ti pannakailukat ti Ilocos Sur Adventure Zone iti Banaoang, nagbaetan ti ili a Bantay ken Santa idi Disiembre 17.

Karaman kadagiti mabalin nga ay-ayamen ditoy ti rock climbing ken rappelling wenno pananguli kadagiti bato a bantay, kayaking ken panaggian iti uneg ti zorb ball iti mismo a karayan Abra ken ti sikat a zipline a bumallasiw iti karayan.

Sakbayna, nagdalan iti makalawas a panagsanay dagiti napili nga empleado a mangtarawidwid iti lugar tapno masigurado ti napintas a serbisio ken seguridad dagiti mayat a mangpadas kadagitoy nga extreme sports.

Mainaig itoy naangay ti Traverse Ilocos Sur Adventure Challenge: Discover the Wonders of Ilocos Sur a nakipartisiparan ti sangapulo ket lima a celebrities a pakaibilangan da Emilio Garcia, Tyrone Perez ken Sam Pinto.

Manipud iti heritage village, nagdalan dagiti partisipante kadagiti tourist spots ti Vigan, kas iti Plaza Burgos a  pagaramidan iti empanada, iti Pagburnayan, Baluarte Zoo, Bantay Bell Tower, sada nagtarus iti karayan ti Banaoang a naglangoyan ken nagbangkaanda a nagaramat iti gaud (kayaking), kas mangipasimudaag iti pannakailukat ti Adventure Zone.

Segun ken ni Gov. Luis “Chavit” Singson, napanunotda ti mangipasdek iti Adventure Zone tapno adda mainayon a pagpasiaran dagiti turista. Kinunana a masansan ngamin nga agsapul dagiti agpasiar iti sabali pay nga aktibidad nga aramidenda bayat ti kaaddada iti probinsia ket daytoy ti napagnunumuanda nga ipasdek.

“Malaksid a makaawistayo iti ad-adu pay a turista ken maipakitatayo ti pintas ti aglawlaw ditoy a lugar, maaddaantayo pay iti pamastrekan ta adda bayad ti panangusarda kadagiti pasilidad,” inlawlawag ni Singson.

Impakaammo met ni Vice Gov. Deogracias Victor Savellano nga inaldawton a silulukat ti Adventure Zone para kadagiti mayat a mangpadas kadagiti ay-ayam ditoy.

“Makunak a naidumduma met daytoy no ikumpara kadagiti adda iti kabangibang a probinsia nangruna la unay iti zipline. No iti ngatuen dagiti nalalayog a kayo ti nakaibitinan ken dumalanan dagitoy, ti nadalus a karayan Abra ti dumalanan ti Ilocos Sur Adventure Zone,” kinuna ti bise gobernador.#