Agad-adal, teaching, non-teaching staff iti Vigan City public schools, naipaayan seguro

VIGAN CITY- Malaksid iti school supplies, naikkan dagiti agbasbasa iti pagadalan-publiko ditoy siudad iti insurance, daytoy ti naammuan manipud ken ni Mayor Eva Marie S. Medina itay nabiit.

Kinuna ni Medina a saan a kas iti kallabes a narungbo ti naited nga school supplies kadagiti agbasbasa iti elementaria iti public schools iti daytoy a tawen agsipud ta impangpangrunada ti pannakaited iti accident insurance kadagiti agbasbasa, teaching and non-teaching staff iti amin a public schools iti siudad ti Vigan.

Kinuna ni Medina a nagiwarasda iti school supplies, saan a mangsigurado a nasayaat a klase ti edukasion no di ket tapno mangtulong kadagiti nagannak tapno bumassit ti gastuenda iti panagbasa dagiti annakda.

Mainaig iti insurance a maited kadagiti ubbing, kinuna ti mayora a saan a panangidawat iti kaadda iti dakes a mapasamak kadakuada, no di panagsagana tapno adda pagsanggiranda no bilang adda dakes a mapagteng.

Naggapu iti pondo a naigatang iti school supplies ken insurance iti Education Fund, kinuna ni Medina.#