Agama a nangpatay iti polis, masuspetsa a kameng ti gun for hire

BANTAY, Ilocos Sur – Masuspetsa a kameng iti grupo a matangdanan a pumatay dagiti agama a nangpaltog iti maysa a polis iti paglakuan iti bibingka sadiay Barangay Naguiddayan, ditoy nga ili idi malem ti Oktubre 6.

Ngem nagtalinaed a sarado ti bibig da Henolino Sayo y Garcia, 48, naasawaan, ken ti anakna a ni Noriel Sayo y Talania, 23, baro, agpada a residente iti Barangay Pug-os, Cabugao bayat ti kaaddada iti ospital a nakaitarayanda para iti pannakaagas dagiti sugatda a sinagrapda idi nakipinnaltog ti puntiriada a patayen a polis.

Pimmusay iti Metro Vigan Cooperative Hospital ti pinaltogan dagiti agama a polis a ni SPO3 Marcelino Presto, Jr. y Tugade, 41, naasawaan, PNP member a naka-assigned iti San Fernando City Police Station, San Fernando, La Union gapu kadagiti sugatna iti nadumaduma a paset ti bagina.

Segun iti inisial a panagimbestiga dagiti polis, iti dayta a malem, mapan agreport ni Presto iti San Fernando City police station a nakalugan iti nangisit a Honda Civic a kotsena ngem nagsardeng iti The Sisters Bibingka sadiay Barangay Naguiddayan, Bantay.

Bayat a gumatgatang ni Presto iti bibingka, kellaat a nagsardeng ti nalabaga a Honda XRM motorcycle a nagluganan dagiti agama a Sayo ket pinaltogan ti laklakay a Sayo iti sumagmamano a beses ti biktima a nagsagrapan daytoy iti sugat iti nadumaduma a paset ti bagina.

Mapapati a nabaelan pay ti biktima ti nagtaray iti luganna ket innalana ti paltogna sana pinaltogan ti lakay a Sayo.

Mapapati a pinidut ti ub-ubing a Sayo ti paltog ti amana ket pinaputokanna ti polis ngem bimmales ti biktima a nakasugatan met ti suspek.

Pinadas nga intaray ti biktima ti bagina babaen ti panangmanehona iti kotsena ngem simmardeng iti sanguanan ti Highway Patrol Group ta nakapsuten.

Intaray dagiti kameng ti HPG ni Presto iti Metro Vigan Cooperative Hospital, Bantay, Ilocos Sur ngem saanen a naisalba ti biag ti biktima.

Segun iti report, kinamat dagiti nagresponde a polis dagiti naglibas a suspek a nakasakay iti motorsiklo.

Mapapati a saan nga intaltalek ti ub-ubing a Sayo a nagmaneho iti motorsiklo ti panangpasardeng kadakuada dagiti polis agingga a nasapgid ti luganda a puon ti nakaikrasanda.

Intaray dagiti polis dagiti agama iti Metro Vigan Cooperative Hospital a nakaitarayan met ni Presto.

Iti kaudian a report, nalasatanen dagiti agama ti peggad. Ngem nairut ti pannakabantay dagiti suspek para iti seguridadda.

Kabayatanna, nakarekobre dagiti inbestigador iti crime scene iti 11 a naiputok a cartridge shells manipud iti cal 5.56, maysa a bala para iti cal 5.56, 4 a kapsula manipud iti cal. 45 ken maysa a deformed slug manipud iti cal. 45.

Uppat a paltog ti nasarakan dagiti inbestigador iti kotse ni Presto a pakaibilangan ti maysa a cal 9mm pistol a marka Beretta nga addaan iti 3 a short magazines ken 25 a bala; maysa nga M16 armalite rifle a marka Elisco nga addaan iti dua a long magazines ken 38 a bala; maysa a cal. 45 Colt pistol nga addaan maysa a short magazine ken 6 a bala; ken maysa a cal 38 revolver nga awanan iti serial number.

Nakarekobre met dagiti polis iti maysa a cal. 45 pistol a nagmarka iti Remington nga addaan serial number 101268 nga addaan dua a short magazines ken 2 a bala ken maysa a glass tooter ken maysa a nakuppil a berde a lighter iti ikut dagiti suspek.

Iti kaudian a report, napilaanen dagiti suspek iti panaglabsing iti RA 10591. Sabali a kaso a panaglabsing iti Section 12 ti RA 9165 ti naipila maikontra ken ni Henolino Sayo.#