Itay Nobiembre 19, nagdudupudop dagiti Pinoy iti sanguanan ti telebision ken kadagiti pagsinean tapno buyaenda ti pannakaiboksing ni Manny Pacquiao ken ni Erik Morales, ti boxing idol dagiti Mehikano.
Anian a riaw dagiti kakailian bayat ti panangdarundon ni Pacquiao ken ni Morales ket uray la marba ti pasdek a yanda idi daleben ti idoloda ti karupakna a boksingero.
Tallo laeng a rikus ti nabaelan ni Morales iti pigsa ken kinapardas ti danog ni Pacquiao idinto nga iti kallabes, kinunana nga awan ti panagraemna iti kabaelan ti Pinoy a boksingero ken dina narikna dagiti danogna iti baet a na-TKO iti maikadua a panagboksingda.
Iti maysa a pagilian nga agtultuloy ti saan a panagkakasurotan dagiti agindeg gapu iti agsusupadi nga ideolohia, pammati, politika ken pagtaktakderan, iti uneg ti sangapulo a minutos (kaibatogan ti tallo a rikus), maymaysa ti rikna ken panunot dagiti Pinoy, sangsangkamaysada a nangibando a maipagtangsitda ti kailianda, a rimbawanda ti kabaelan uray dagiti kalaingan iti sangalubongan.
Nasamsam-it pay ti balligi ni Pacquiao agsipud ta sinarunona dagiti balligi dagiti padana a Pinoy, kas kada Efren “Bata” Reyes, Francisco “Django” Bustamante, ken itay nabiit, ni Ronato “Ronnie” Alcano a nangibalat kadagiti kalaingan a bumibiliar manipud kadagiti nadumaduma a pagilian iti sangalubongan iti panangiyalatna iti kampeonato iti World Pool Championship. Kapada ni Pacquiao dagitoy a nagtaud iti marigrigat a pamilia ngem gapu iti determinasion ken pammatida iti bukodda a kabaelan, inwalinda amin a lapped iti dalan tapno magun-odda ti balligi.
Ngem karaip ti balligi ti isasangbay dagiti manglimlimo a gagayyem. Ta kastay kunada, no narnuoyan ti bunga ti kayo, adu dagiti umuli a makipagburas. Wen tay tagapulot a bunaren agsipud iti kinasam-itna.
Idi rugrugian da Pacquiao, Reyes, Bustamante ken Alcano ti panangraatda iti dalan iti panangpadasda a mangsibbol iti balligi, manmano dagiti nangited kadakuada iti suporta ken pannarabay.
Ita ta nalatakdan, adun ti umas-assibay. Saan a pudpudno a gagayyem dagitoy. Dagitoy dagiti addaan iti bukod nga interes. Dagitoy dagiti kayatda laeng ti mairanud iti kinalatak da Pacquiao ken dagiti kakaduana.
Masaludsod: yan dagitoy idi tiempo a karigat ti panagbiag da Pacquiao ken dagiti kakaduana? Addada laeng iti arubayan, nakadalikepkep, awanan iti panangitaltalek sadino man ti turongenda. Ngem ita ta naglatakdan, timpuar dagiti adun a gagayyemda, naisem a mangsallabay ken mangkablaaw kadakuada ken mangited iti nabara a pannakasarabo.
Kas ken ni Pacquiao, maisaysayanggusengen nga ar-armen ti maysa a kandidato tapno agbalin a katiketna iti masungad nga eleksion. No saan a naglatak ken nagbalin nga idolo dagiti tattao ni Pacquiao, taliawen ngata daytoy a politiko?
Maiballakadmi kada Pacquiao ken dagiti kas kenkuana a nalataken: salimetmetanyo dagiti gagayyemyo idi karigat ti panagbiagyo. Dagitoy dagiti pudpudno a gagayyem. Annadanyo dagiti umas-asideg ita ta napurosyon ti balligi. Agpampammarang dagitoy a gayyem, kayatda laeng ti mairanud iti kinalatakyo ken tapno maidur-as ti nalimed ken bukodda nga interes.
