Footer

Agannad kadagiti peke a Christmas lights: DTI

VIGAN CITY – Imballaag ti Department of Trade and Industry-Ilocos Sur kadagiti umili ti panagannadda iti panaggatangda kadagiti Christimas lights a mailaklako kadagiti pagtagilakuan amangan no peke laeng dagitoy a nadaras a madadael ken posible a pagtaudan pay iti uram.

Iti pakdaar nga imparuar ti DTI babaen ken ni provincial director Grace Lapastura, indagadagna ti panagannad dagiti kustomers iti panaggatangda kadagiti Christimas lights ta kadawyan nga agraira dagiti peke a dekorasion a silaw no dumteng ti panangselebrar iti Paskua iti pagilian.

Kinuna ti DTI a kitaen dagiti aggatgatang iti Christimas lights no adda met la markada a PS wenno Globe Check Mark a nakamarka mismo iti produkto a naaramid ditoy pagilian.

Inyunay-unay ti nasao nga ahensia nga addaan dagiti Christmas lights a naggapu iti sabali a pagilian iti ICC  sticker. 

Agingga itay Oktubre 30, daytoy a tawen, addan 21 a brand dagiti Christmas lights ti nakapasa iti DTI.#