Agannad, mailaklako a peke a high breeder seeds: DA

BANTAY, Ilocos Sur – Imballaag ni Provincial Agriculture Officer Teofilo Quintal kadagiti mannalon iti panagannadda a gumatang kadagiti agpaspasiar a tattao nga aglaklako iti high breeder palay seeds tapno saanda a mailawlaw-an.

Kinuna ni Quintal nga adda nadamdamagda nga agpaspasiar a tattao kadagiti nadumaduma a lugar iti probinsia nga aglaklako iti mapapati a high breeder seeds sana imballaag kadagiti mannalon a saanda a gumatgatang agsipud ta saanda met a masigurado a nangato ti maapitda manipud kadagitoy.

“Pangngaasiyo, no adda maisarsar-ong iti lugaryo nga aglaklako iti breeder seeds, saankayo a gumatgatang ta amangan no mailawlaw-ankayo,” imballaag ni Quintal.

Segun iti report, agpateg iti P4,500 dagiti high breeder palay seeds nga ilaklako dagitoy a tattao nga agpaspasiar kadagiti nadumaduma a lugar iti probinsia.

Kinuna ni Quintal a kitaen dagiti mannalon no adda tag dagiti lako dagitoy a tattao tapno makitada no genuine a high breeder seeds ti ilaklakoda.

Segun pay ken ni Quintal, mabalbalatong laeng dagitoy nga aglaklako agsipud ta dagiti adda laeng iti research stations dagiti makapagmula iti breeder seeds.

Kinuna ti provincial officer a suspetsoso dagitoy nga aglaklako kadagiti di masigurado a high breeder seeds agsipud ta saanda nga impakaammo nga immuna iti opisinada a kas iti ar-aramiden dagiti rehistrado nga aglaklako iti breeder seeds.

Imballaag pay ni Quintal a no gumatang dagiti mannalon kadagitoy a tattao iti high breeder seeds, adda pay posibilidadna a lumtuad dagiti nakarkaro a sakit nga aggapu kadagitoy a bukbukel agsipud ta saanda a naglasat iti opisinada.#