Agapitda Uray Dida Nagmula

 Salaysay ni Jobert M. Pacnis

 

Awan gidiat ti agmula ken ti agsibug; gunggonaanto ti Dios ida segun iti inaramid ti tunggal maysa. – I Corinto 3:8

Kunada, no dika agtrabaho (agmula), matayka a simumulagat. Ta awan ngarud ti apitem! Wen met nga agpayso. Ania ngarud ti kanem no dika met mangged, no addaka latta dita a nakatikkuol; agur-uray iti manabtuog?

Ngem sabali itan ti mapaspasamak, Kabagis. Adu dagiti nasayaat ti biagna nga awan pay uray maysa a bukel nga intukitna. Saan a literal ti kayatko a sawen, Kabagis. Dagiti addaan panggedan ti sasawek? Saan, Kabagis.

Kitaem ti biag ‘ta kaarrubam (kaarrubak, kunak koma ngem baka palapalendak) a baket. Ti la makikinnuto ti obrana iti agmalem. Dayta met mangil-ilut iti baudna ti pagalistuan ni lakayna. Dagiti annakda? No ania ti puon isu ti bunga, kunada man! Ti nakakaskasdaaw, kanayon a sumaretset ti pariokda. Kanayon a pagilig-isan ti boksitda iti bussogda. Ne, ta apayen? masaludsodmo. Baliktad sa?

Kastoy kasimple, Kabagis. Adda siribda nga awan kenka. Ngem dayta a sirib, isu met ti mangidadanes kadakayo a kaarrubada. Apay, nalaka kad’ ti mapukawan iti taraken wenno mula a nagbambannogan? Sika ti makasungbat kadayta. Ammok a namin-anoka metten a nasibrongan iti nagbambannoganna. Uray la ngarud immasuk ti agongmo idi iti pungtotmo. Gets mo na, Kabagis?

Saan laeng nga iti aglawlawmo ti adda kastana, Kabagis. Kitaem iti gobierno, ayna, agkaraiwara dagiti agap-apit uray dida nagmula wenno nagsibug la koma. Ngem kitaem ti agamangda: napnapno… agbirbirua! Saan laeng a sika ti masdaaw,

Kabagis. Adutayo. No apay nga adu latta dagiti awan konsensiana a nakatugaw iti gobierno, dagiti addaan iti bileg.

Sabagay, amin sa a suli ket adu dagiti sigurista. Iti laengen pagadalan. Ti ammotayo, Kabagis, ditoy ti pakasukogan dagiti annaktayo kadagiti naimbag a kababalin. A ditoy a makitatayo ti pudno a pagsarmingan iti aw-awid. Ngem ania ngay ti mapaspasamak? Ala, saantan a dakamaten dagiti aglakolako, agpailako a titser. Rasonda nga isu pay a pangalaanda iti yawidda a para iti balayda ta sangkapirgis kan’ met laeng ti sueldoda (ngem diak mamati ditoy ta ti ammok ket dakkel metten ti maaw-awatda).

Ngem kitaenta ti mapaspasamak. Alaenta nga ehemplo ti ID dagiti ubbing. Mano ngay ti siningirda wenno singsingirenda? Ayna, uray ringudannak, Kabagis, no di pudno ti kunak a times two ti namay-anda. Imbes a P30 la koma, pabayadanda iti P60! Di kad’ nagapitandatay’ manen a babassit, Kabagis?

Saan laeng a dayta. Kapaliiwak daytoy. Diak la ammo no nadlawmo metten daytoy. Iti man elementaria, sekundaria wenno kolehio, uso ti agpa-project, di kadi, Kabagis? Agkonsentreytta iti elementaria ken sekundaria. Tinawen dayta a project para iti panangpapintas kano iti kuarto tapno agbalin a conducive to learning – daytay ngay makaited iti makaay-ayo nga aglawlaw kadagiti annaktayo tapno ipamaysada ti agbasa.

Agkontribusiontayo iti para electric fan, kurtina, pinta, TV, DVD, kdp. (Uray pay gayam MP3, MP4, CP, ken iPod itan. Diak ammo no kasano a mapapintas daytoy ti kuarto dagiti ubbing, Kabagis.). Ngem ti yanna nga adat, inton umay a tawen, kastanto manen ti maipa-project. Pappapanan ngarud ngay dagiti electric fan kada kurtina iti tinawen? Nadadaelda?  Dimo kunaen a nayanakka idi panawen ti kupongkupong, Kabagis.

Ken adu pay a babassit nga anomalia iti uneg ti pagadalan! Uray payen iti barangay. Nagbassit la ngaruden ti pundo, ayna, ta pagbibinggawanda pay laeng met.

DagitiI naagapad nga ehemplo, isuda dagiti makunkuna a nagmula ken nagsibug ken nangpadakkel iti kayo ti kinadawel a nanglikmut iti balayda (saan a pagtaengan). Kasano ngarud ita a gunggonaan ida ti Dios?

Isu a no maminsan, Kabagis, kaykayatko ti agbalin a memmem ta diak maadalan kadagiti balinsuek a sursuro. Ken kaykayatko ti nanumo nga umili tapno agbiagak latta iti kalapawko a siuulimek ken sitatalinaay nga awan pagbutbutngak.

Ita, dagiti naagapad, Kabagis, no koma laeng ayat ti intukitda, ania ket koman a nagragsak ti lubong! Awanen ti agaapa nga agkakaarruba. Kappia la ketdi ti agari! Iti pagilian, ay, adda dayta kinarang-ay a darepdep ti tunggal umili.

Sika, Kabagis, narugiam kadin ti nangitukit iti bukel a pakarukodamto met? Ala, sibugam koma dayta a bin-i iti ayat, kinapudno ken kinapakumbaba tapno dumakkel a  makaay-ayo iti Dios!#