Agassawa, binagsol ti mannanakaw, 1 ti natay

CANDON CITY – Sinerrek ti mannanakaw ti pagtaengan ti maysa nga agassawa iti Barangay Oaig Daya ditoy ket binagbagsolna dagitoy idi awan ti maitedda a kuarta.

Natay gapu iti bagsol ni Benjamin Manganaan idinto a nakaro a nasugatan ti asawana a ni Adelina. 

Iti inbestigasion ti polis,  nakariing ni Adelina gapu iti karasakas iti ruar ti kuartoda ket idi luktanna ti ridaw, nakitana ti suspetsa a nakabonete.

Imbilin ti suspetsa nga iruar ti biktima ti kuartana ket idi insungbat daytoy a P20 laeng  ti maitedna, binagsolen ti  suspetsa.

Nagtaray a rimmuar ti baket ket nagpaarayat. Intaray dagiti kaarrubada ti biktima iti ospital.

Iti panagresponde dagiti polis, nadatnganda ti asawa ti baket a nadigos iti bukodna a dara. Saanen a naidanon ti biagna iti ospital.

Di pay ammo ti kinasiasino ti mannanakaw. (Danny Antalan)