CANDON CITY – Agingga ita di patien dagitoy agassawa a makarnap ti motorsikloda ken madukot ti babai kabayatan ti panagdaliasatda iti maysa a barangay ditoy.
Kinuna dagiti agassawa a da Antonio Gambol ken Elsa Gambol, agnaed iti barangay San Agustin a kasla dida patien a mapasamak kadakuada daytoy.
Segun kadagiti biktima, pampanurnorenda ti kalsada ti Bagar nga agpalaud a nakalugan iti XRM a motorsiklo iti agarup 9:30 iti rabii ket nagmenorda idi masungadda ti nauneg a paset ti kalsada, ngem dita metten a kellaat a nagparang iti dalanda dagiti tallo a lalaki a nakabonete.
Pinaturongan dagiti lallaki iti paltog ti agassawa sada pinababa dagitoy.
Segun iti inbestigasion, sinakayan ti maysa ti motorsiklo idinto nga inkuyog dagiti dua ti babai iti panaglibasda.
Nagtaray ti biktima a kimmamang iti national highway sa nagpatulong.
Dagus a nagresponde dagiti pannakabagi ti linteg ngem didan nasarakan dagiti suspetsa.
Alas singkon iti agsapa idi simmangpet ti babai iti balayda. Nupay kasta, awan ti senial a dinangran dagiti nangitalaw kenkuana.
Di pay ammo ti kinatao dagiti nanghold-ap kadagiti agassawa.