Agassawa nasaneb, napapatay ti lalaki

STA. LUCIA, Ilocos Sur – Maysa a mannalon ti napapatay iti imatang ti asawana bayat ti panagawidda manipud iti maysa a religious workshop itay nabiit.

Natay nga insigida ni Feliciano Dumag, 66, mannalon, residente iti Namatican ditoy gapu kadagiti sugatna iti nadumaduma a paset ti bagina.

Saan a naan-ano ti asawana a nakasakay iti likud ti motorsiklona.

Segun iti inisial nga inbestigasion, kagapgapu dagiti agassawa manipud iti maysa a gimong nga inangay ti Iglesia ni Kristo iti Barangay San Pedro ditoy met laeng nga ili ket aggawiddan idi nagpatengnga dagiti di nabigbig nga armado a tattao iti dalan sada pinaputokan ti biktima.

Nakarekobre dagiti inbestigador iti nakapasamakan ti krimen iti 3 a kapsula manipud iti cal. 45 ken maysa a kapsula manipud iti cal. 9 mm .

Di pay ammo ti motibo ti nasao a pammapatay.#