Agassawa, pinaltogan nagkalubbon iti motorsiklo

CAOAYAN, Ilocos Sur – Nagkalubbon manen iti motorsiklo dagiti nangpaltog iti agassawa a nakalugan iti motorsiklo idi malem ti Abril 10 iti Barangay Anonang Menor ditoy nga ili a nakasugatan ti lalaki.

Intaray ti maysa a tricycle driver ni Eulogio Alconcel y Paraan, Jr., 59, naasawaan, ken residente iti Barangay Pantay Tamurong ditoy nga ili iti Vigan Polyclinic Hospital sa naiyalis daytoy iti Metro Vigan Cooperative Hospital a nakaoperaanna gapu iti sugatna iti abaga.

Segun iti inbestigasion, aggawiden dagiti agassawa a nakalugan iti motorsiklo ket idi addadan iti nadakamat a provincial road, nagparang iti likudanda dagiti di nabigbig a tattao a riding in tandem ket pinaltogan ti maysa ni Alconcel.

Saan a naan-ano ni Cristina, asawa ti biktima.

Nakarekobre dagiti inbestigador iti dua a kapsula iti nakapasamakan ti krimen.

Di pay ammo ti motibo ti pammaltog.#