Agawidka inton Paskua

Sarita ni Danilo S. de Guzman

(Umuna a paset)

 

Saanen a mailibak ti nalam-ek a parbangon ti umadanin a paskua. Nadalus ti arubayan, nakaykay dagiti nagango a bulbulong, rutroting ket awan iti makita a rugit ta naummongda iti suli ti solar wenno iti likudan ti balay tapno puoran dagiti  managsapsapa a bumangon a paginudoanda kabayatan ti panagareb-da iti kape, a gagangay a nagisawsawanda nga immuna iti tinapay a lako ti managsapsapa met nga agipaspasiar. Tipikal a buya daytoy iti probinsia.

Makumikomen dagiti kameng tunggal pamilia iti Purok Daya ti Barangay San Pascual nga agpanunot iti indanto pagsasanguan inton dumteng ti noche buena; makumikomen dagiti agtutubo nga agpanunot kadagiti iregaloda ken agplano iti pangpanggependa nga aramiden iti Christmas party.  Amin ket sinallukoban iti gagar ti panangselebrarda iti pannakaipasngay ni Apo Jesus iti nanumo a kulluong.

Makumikom ti amin malaksid kadagiti agkabsat nga agtutubo, da Cles, agtawen iti kinse ken Myrna, agtawen met iti sangapulo ket walo, a sinallukoban ti daguyemyem, lalo itoy nga isasangbay ti paskua. Imbes nga inda arakupen ti espiritu ti paskua a siraragsak, kabaliktadna, ta makariknada iti ubbaw ken pannakaikawa, ket saanda a marikna ti kaipapanan ti paskua. Dakkel ti rason no apay a saanda a naragsak: nagsina dagiti dadakkelda sumagmamanon a bulan ti napalabas.

Dati ngamin a naragsakda a sangapamilia lalo no kastoy a dumteng ti paskua. Ngem ita saanen. Daytoy ti umuna a panagpaskuada a saanda a marikna ti nabara a kaipapananna? Sapulenda ti nakairuamanda? Ngem ania ti aramidenda? Ni dida pay ammo no apay a nagsina dagiti dadakkelda.

Iti dayta a malem, bumanugbog ti videoke ti kaarubada a balay, agraragsak dagiti padada nga agtutubo, nalawag a mangngegda ti maipatpatayab a sonata ti paskua: Give love on christmas Day…

“Apay kadi a nauneg ti pampanunotem, Cles?”

“A-awan, manang,” nagsennaay ketdi ti inaudi.

“Awan? Ket no naguneg ti sennaaymo?”

“Pampanunotek laeng dagiti naglabas nga aldaw ti panagbiagtayo, manang…”

“Ha? A-ania ti kayatmo a sawen?”

“Naragsaktayo idi adda pay laeng ni tatang ditoy dennatayo, saan kadi, manang?”

Saan a nakasungbat ti inaunaan, imbaw-ingna ti imatangna tapno mailingedna met ti pananguksotna iti nauneg a sennaay. Wen, saanna met a mailibak iti bagina a dakkel ti namalbaliwan ti amin: sigud nga aktibo kadagiti aramid dagiti agtutubo iti purokda ngem gapu  iti panagsina dagiti dadakkelda, naminpinsan a nagpukaw dagita a ganaygay, kasla nagpukaw nga asuk a saanen a makita pay iti kaanoman. Maitutop kadi a sagabaenda ti bunga ti panagsina dagiti dadakkelda?

“Ngem ita, agpaskuatayo nga awan ni tatang. Apay kadi a nagsina da tatang ken nanang, manang?”

“Dayta ti diak ammo, ading.”

“Saanka kadi nga umapal, manang, kadagiti gagayyem ken am-ammotayo nga adda  nanang ken tatangda iti sibayda itoy a paskua?”

“Samman a, apay ket a saanen?”

“Manang, adda  pampanunotek, nasken nga agsubli ni tatang. Pagtinnulonganta nga aramiden!”

Kaunaan nga addangda ti panangammoda no apay a nagsina dagiti dadakkelda. Naammuan lattan dagiti agkabsat iti kinaadda ti saan a pagkinnaawatan dagiti dadakkelda. Agingga dimteng dagiti aldaw a saanen nga agawid iti balayda ni tatangna manipud iti trabahona a kas empleado idiay munisipio. Sadiay balay dagiti dadakkelna iti kabangibang a barangay nga agaw-awid. Idi inusisada dayta a banag ken ni nanangda, kinaykayat met daytoy a kaemen ti bibigna. Saanna a sinungbatan ida iti diretso. Inyaw-awanna ket ti saludsodda.

Malem ti Martes. Manipud iti component iti salas maipatpatayab manen ti samiweng ti paskua. Dumdumngeg ni Cles, nakapannimid nga agtantan-aw iti tawada. Dina pay nadlaw ti yaasideg ti inana a nagsaludsod.

“Apay nga agpanpannimidka dita? Apay a dika mapmapan makimisa de gallo? Sumurotka kadagiti kaarrubatayo a tumayutoy a mamarbangon a mapan sadiay simbaan. Sika laeng ti saan a mapmapan.”

Immanges iti nauneg ni Cles. Pinerrengna ti inana. Ket kinunana: “Malaglagipko laeng ni tatang, ‘’nang. Kaano kadi nga agawid?”

“Hmn, bay-amon a panunoten daydiay a tao! Uray saanen nga agparparang pay iti kaanoman. Kabaelankayo a biagen ken pagbasaen agingga a makaturposkayo. Isu a saanyon a panunoten pay ta serserbina ta awan ti serserbina. Agdadaelkayo laeng iti panawenyo.”

(Adda tuloyna)