Banner News: Agbalinton ti PSHS IRC nga educational and tourist destination iti Ilocos – Dir. Orteza | Tawid News Magazine - Weekly Ilocos News 📰

Agbalinton ti PSHS IRC nga educational and tourist destination iti Ilocos – Dir. Orteza

Philippine Science High School Ilocos Region Campus

SANTO DOMINGO, Ilocos Sur – Kalaksidan a maibilang a kaprestihiosuan a pagadalan iti siensia ti sekundaria iti Kailokuan, manamnama ti panagbalin ti Philippine Science High School Ilocos Region Campus (PSHS IRC) a maysa kadagiti kangrunaan nga educational and tourist destination iti Ilocos Region no maleppaston ti moderno a planetarium ken science laboratory iti uneg ti campus.

Dayta ti inrakurak ni PSHS IRC Campus Director Dr. Ronnalee Orteza kadagiti kameng ti media iti naangay a press conference kabayatan ti selebrasion ti maika-17 Foundation Anniversary ti pagadalan. Naangay ti press conference sadiay West Loch Hotel idi Pebrero 5, 2019 kalpasan ti programa a dinar-ayan dagiti agdama ken sigud nga opisial ti Department of Science and Technology, PSHS ken Municipal Government; ken nakaipaayan dagiti International Standard Organization certification ken pammigbig kadagiti sigud ken agdama nga agpapaay iti PSHS.

Impakaammo ni Dir. Orteza nga iti 17 a tawen nga operasion ti pagadalan manipud idi nabangon idi 2002 ket nakapatanoren kadagiti adu a propesional a nagballigi iti nagduduma a tay-ak kas iti science, technology, medicine, engineering ken dadduma pay a propesion.

Impalgakna nga iti agdama nga school year ket addaan ti eskuelaan iti 525 nga estudiante nga scholar manipud Grade 7 agingga iti Grade 12; 202 kadakuada dagiti taga-Ilocos Norte, 148 dagiti naggapu iti Ilocos Sur, 114 iti Pangasinan, 25 iti La Union, ken dagiti dadduma ket naggapu iti probinsia ti Abra, Cagayan, Tarlac, Pampanga, Metro Manila, Rizal, Cavite ken Laguna.

Inyawisna kadagiti nagannak dagiti agad-adal iti elementaria a guyoguyenda dagiti annakda nga agadal iti PSHS kas scholar ti gobierno a maaddaan kadagiti adu a benepisio ken pribelehio kas panangisagut kadagiti ubbing iti nangato ti kalidadna nga edukasion para iti naraniag a masakbayanda. Impasingkedna kadagiti nagannak ken pamilia dagiti estudiante iti PSHS IRC a natalged ken nasayaat ti pannakaaywan dagiti agad-adal kabayatan ti panagbasa ken panagnaedda iti campus.        

Inrakurakna nga iti agdama ket agtultuloy dagiti nagduduma a construction projects iti uneg ti 5.3 nga ektaria a campus ti pagadalan para kadagiti nayon a pasdek ken pasilidad. Nakaprograman ti pannakabangon nalawa ken kompleto a laboratorio ti siensia, ken planetarium a pakaipananto dagiti dadakkel ken moderno a teleskopio ken alikamen a pangbuya ken pangadal kadagiti adda iti adayo a tangatang.

  Iti mensahe ni San Ildefonso Mayor Mark Anthony Purisima, impaganetgetna ti kinapateg ti pannakabangon ti PSHS para ti panagdur-as ti edukasion ken ekonomia iti ilida. Impakaammona a ti PSHS ket pinatanorna dagiti adu a nagballigi iti nagduduma a propesion, ken pinaglatakna ti bassit nga ilida iti Pilipinas. Pinagyamananna dagiti mangidaulo ti PSHS iti nasayaat a panaglangenda iti Municipal Government, ken impasingkedna nga uray saanton a mayor ket agtultuloyto ti itutulong ken panagsuportana iti pagadalan. Impalgakna pay ti panggepna a sakbay ti panaggibus ti terminona a mayor inton Hunio ket kayatna ti makibinnulig kadagiti mangidaulo iti PSHS para iti panagmula iti adu a kayo iti uneg ti campus tapno bumerde ken lumamiis iti aglawlaw ti pagadalan para iti napinpintas a buya ken komportable a pagbasaan dagiti estudiante.  

Iti met panagsarita ni sigud nga Ilocos Sur 1st District Rep. Salacnib Baterina, sponsor iti Republic Act No. 9036 para iti pannakabangon ti PSHS IRC, impalagipna ti pakasaritaan ti pannakainaw ti pagadalan manipud idi 1999, makatawen kalpasan ti pannakapilina a diputado. Sinalaysayna a gapu iti ayatna a masagutan dagiti kaprobinsiaanna iti nangato ti kalidadna nga edukasion ket inkagumaanna ti nangaramid iti wagas babaen ti panagpatulongna kadagiti padana a kongresista ken ni sigud a Senador Tessie Aquino Oreta para ti pannakabangon ti PSHS IRC iti umuna a distrito iti Ilocos Sur.

Impalagipna a nakamakamda ti deadline a pannakairaman ti PSHS IRC babaen ti pannakikaysa ni sigud a San Ildefonso Mayor Tito Purisima ket naidonar ti sigud a nababa a lote sadiay Brgy. Poblacion East a nagsaadan ti eskuelaan. Impakaammona a nangrugi iti maysa a pasdek idi manglukat ti campus idi 2002, ket kalpasan ti 17 a tawen, nagadun dagiti nagdur-asanna, ken nagbalinen a nalatak ti eskuelaan. Insingasingna pay ti pannakabangon ti sports oval iti uneg ti campus tapno adda pagtarayan ken pagay-ayaman dagiti estudiante para iti nasaysayaat a salun-at ti pisikal a bagida.

Iti met mensahe ni Mr. Ramon Sumabat, Provincial Director ti Department of Science and Technology, impakaammona ti nasinged a panaglangen ken panagtinnulong ti opisinana ken ti PSHS IRC kas adda iti maymaysa a departamento ti gobierno para iti pannakapadur-as ti siensia ken teknolohia iti Ilocos Sur, Impasingkedna ti agtultuloy a suporta ti DOST provincial office kadagiti gannuat ti PSHS IRC tapno maisayangkat dagiti kasapulan a programa para ti pannakaisaknap ken pannakapadur-as ti science and technology iti Ilocos Sur. ●