Agbuybuya iti pasala, sinarubsob ti kotse, 1 natay

NARVACAN, Ilocos Sur – Maysa a lalaki ti natay idi sinarubsob ida ti maysa a lugan bayat ti panagbuyada iti canvassing iti Barangay Sulvec ditoy nga ili idi rabii ti Abril 23.

Naireport a natay iti Central Ilocos Sur District Hospital ni Romeo Marie y Makiling, 51, naasawaan, mangngalap, idinto a nadunor da Freddie Manglinong y Esteban, 28, nasawaan; Romey Ramirez y Adona, 46, naasawaan, agpada a mangngalap; Corazon Canosa y Cambaliza, 51, baak; Raul Jimenez y Arce, 30, naasawaan, trabahador, agpapada nga agnaed iti nasao a barangay; ken Joey Sayaboc, residente iti Cabugao, Ilocos Sur kalpasan a dinungpar ida ti Mitsubishi Adventure a minaneho ni Maximino Gazmen Jr. y Silva, 52, residente iti Ambulogan, Narvacan.

Naammuan iti inbestigasion nga agpadaya ti Adventure idi mapapati nga inobertekanna ti maysa a nagpainayad a lugan ngem dina nakontrol ti manibela idi agsubli iti liniana ket sinarubsobna dagiti biktima nga agbuybuya iti pasala a nakadunoranda.

Inaresto dagiti polis ti nagmaneho iti Adventure.#