Agdakdakiwas a kidnap gang: false alarm, kuna ti kapolisan

MANILA – Malicious texting!

Daytoy ti reaksion ni PNP Chief Gen. Avelino Razon iti agwarwaras a text message a mangbalballaag iti publiko iti kaadda iti maysa a van nga agdakdakiwas kadagiti probinsia nga agdukot kadagiti ubbing tapno maala dagiti nagunegda.

Iti interbio ti maysa a di nainaganan a balasitang a taga-Calamba, Laguna iti ABS-CBN a naipabuya idi rabii ti Marso 12, kinunana a dandani kinidnap ti maysa a grupo ket idi iluganda koman, nakitana ti sumagmamano nga ubbing nga agsangsangit iti uneg.

Ngem kinuna ni Razon bayat ti interbio kenkuana ti media a naipabuya met laeng iti nasao a telebision station ken naipatangatang iti radio, nga iti kaadu ti problema ti kapolisan, saan koma nga inayon daytoy a pangriribuk kadagiti tattao idinto nga indagadagna kadagiti tattao ti saanda a panamati iti agwarwaras a text message.

Kabayatanna, inwaragawag  ti Baguio City Police Office nga awan ti kinapudnona ti agwarwaras a text message a positibo nga agdakdakiwas ditoy siudad ti maysa a lugan a mapapati a nagluganan dagiti agdukdukot kadagiti ubbing tapno maala dagiti nagunegda.

Segun iti Baguio City Police Office, awan ti inruarda nga advisory a nangibagaanda kadagiti residente ditoy iti kaadda ti maysa a white van a mapapati a lugan dagiti agitaltalaw iti ubbing sa maala ti internal organsda.

Iti nagwaras a text,  nagtagiplaka ti nasao a lugan iti  BMM 507, OPD  434 wenno BXE  351.

Kinuna ti BCPO a nangiwayatda iti panagsawar iti intero a siudad ngem awan ti nasarakanda a lugan nga addaan iti kasta a plaka.

Sumagmamano a residente ti mapapati a timmawag iti polis a nakitada ti nasao a lugan iti Loacan ket adda nakidnap nga ubbing.

Sabali pay a damag ti dimmanon iti estasion ti polis ti kaadda ti kasta a lugan iti Don Bosco School iti Trancoville ken iti Rizal Elementary School, ken iti direksion a mapan iti La Trinidad, Benguet.

Ngem iti panagpalutpot dagiti polis ditoy, kinunada a negatibo dagiti nasao a report.

Nupay kasta, nangipatulod ti BCPO kadagiti polis nga agbantay kadagiti nadumaduma a pagadalan iti siudad nangruna iti elementaria, haiskul ken day care centers tapno maalay-ayan ti panagamak dagiti nagannak.

Sakbayna, nagwaras ti text message a mapapati a naggapu iti maysa a bise mayor iti Talisay, Batangas a nangballaaganna kadagiti nakaawat iti kaadda iti maysa a puraw a van nga agdakdakiwas nga agbirbirok iti dukotenda nga ubbing tapno alaenda dagiti nagunegda.

Ngem kinuna ti PNP regional director iti Region IV nga awan ti kasta a mensahe a naggapu iti Batangas.

Kinuna met ti bise mayor ti Talisay, Batangas nga awan ti impatpatulodna a text message iti kaadda iti maysa a van nga agdakdakiwas iti dukotenda nga ubbing.

Malaksid iti Batangas, mapapati a nagwaras ti text message iti Cavite, Laguna, Rizal, Quezon, Baguio, Metro Manila ken ditoy Ilocos.#