BANTAY, Ilocos Sur – Imballaag ti Bureau of Fisheries and Aquatic Resources a dakkel ti maipataw a pannusa kadagiti matiliwan nga agkalap, agtiliw ken agdangran kadagiti dolphin a maiyaw-awan iti kabaybayan ti probinsia.

Kinuna ni BFAR officer Benny Saraos nga asinoman a matiliwan nga aglabsing iti daytoy a linteg, posible a madusa iti pannakabalud manipud iti maysa agingga iti 12 a tawen.

Imbatad daytoy ni Saraos gapu iti sumagmamanon a dolphin a nagsanglad iti probinsia a biktima iti pannakadangran.

Maysa a dolphin ti nasarakan iti kabaybayan a sakup ti Barangay Patpatta iti Candon City nga addaan iti dunor iti bagina a gapuanan ti pammaltog a puon ti nakatayanna.

Maysa ti dolphin kadagiti maibilang nga endangered specie a kasapulan a masalakniban tapno saanda a maungaw.

Kinuna ni Saraos a maipada iti linteg a mainaig iti panagtiliw, panagkalap ken panagpaltog iti dolphin iti kaso a murder nga awan ti piansa ti akusado.

Kanaig daytoy, intuding ni Provincial Agriculture Officer Teofilo Quintal a maitabon dagiti masarakan a matay a dolphin iti abay ti opisina ti DA  a masarakan iti dayaen ti akintengnga a Govantes dike.

Segun ken ni Quintal, ti nasao a lugar ti agbalin a pannakasementerio dagiti matay a dolphin.#