Footer

Agduduma a programa agrikultura, irusat ti gobierno probinsial

SAN JUAN, Ilocos Sur – Inwaragawag ni Gob. Deogracias Victor “DV” Savellano nga irusat ti gobierno probinsial dagiti agduduma a programa pang-agrikultura a makatulong kadagiti mannalon ti probinsia bayat ti naangay a second quarter meeting dagiti municipal ken city agriculture officers iti BArangay demo farm iti Brgy. Labnig itoy nga ili itay nabiit.

Kangrunaan ditoy ti  direkta a panagangkat ti gobierno probinsial iti abuno manipud iti pagilian a Russia ken Oman.

Kinuna ni Savellano a mangnamnama  a malpas amin a proseso sakbay ti panaggaganagan dagiti mannalon.

Kinunana a babaen ti direkta a panaggatang iti abuno, dakkel ti maksayan a gastos dagiti mannalon. Umaboten iti P1,850 ti abono a Urea idinto a P1,950 ti complete fertilizer.

No matuloy ti nasao a gannuat, P1,000 agingga iti P1,100 laeng ti ited ti gobierno probinsial a landing price kada sako.

Natinong pay itoy a taripnong ti panagsanay dagiti M/CAO, coordinators ken farmer leaders iti panagproseso iti organic farming kas panagsagana iti plano ni Savellano a mangipatakder iti pagaramidan ti organic nga abuno tapno ma-maximize ti resources ti probinsia.

Dinawat ti gobernador ti suporta dagiti LGUs iti daytoy a plano babaen ti panangitedda dagiti waste materials ti ilida a kasapulan iti panagaramid iti organiko nga abono.

Kinuna ni Savellano a babaen itoy a wagas, agbalin payen a livelihood ti panagurnong iti basura ken saanen a kasapulan nga aggapu iti ruar ti probinsia dagiti kasapulan iti panagproseso iti abono.

Impakaammo pay ti gobernador nga irugi ti gobierno probinsial ti agpamula iti rambutan, marang, lansones ken dadduma pay nga exotic fruits kadagiti upland municipalities kas paset  ti programana para iti food production tapno malapdan ti panagbisin iti Ilocos Sur.

“Initially, mangmulatayo iti maysa nga ektaria kada ili, ” kinuna ni Savellano.#