Aggassawa, naikras ti luganda gapu’t kaawan warning device

BANTAY, Ilocos Sur – Gapu iti kaawan ti warning device iti sakbay ti nagkalian iti kalsada, naikras ti motorsiklo a nagluganan ti agassawa a puon ti nakayospitalanda.

Iti report manipud iti polis ditoy, naikras ti Honda Wave 110 motorcycle a minaneho ni Antonio Reynon y Rallojay, 58, kasakayna iti likud ti asawana a ni Lourdes, 58, agpada a residente iti  Sta. Catalina, Ilocos Sur sadiay Barangay Sinabaan, ditoy nga ili idi agarup 6:40 ti malem ti Septiembre 25.

Iti panagimbestiga dagiti polis, agpadaya a direksion dagiti agassawa ket idi makadanonda iti nakapasamakan ti aksidente, saan a nakita ni Reynon ti nakali a tunged ti kalsada agsipud ta awan ti naikabil a warning device ket naikrasda.

Naitaray dagiti agassawa iti Metro Vigan Cooperative Hospital para iti pannakaagas ti dunorda iti ulo ken iti bagida.

Sakbay daytoy, addan naireport a kaarngina nga aksidente iti lugan gapu iti kaawan ti warning device iti madama a road widening ti DPWH ditoy nga ili.#