Aggatgatang iti baka, nahold-ap

MAGSINGAL, Ilocos Sur – No masalamaam iti naiputputong a lugar ti maysa a nadadaelan a motorsiklo ket ganggannaet a rupa dagiti agpatulong kenka, agannadka amangan no sika ti sumaruno a biktima ti panaghold-ap.

Napasamak daytoy iti maysa a koridor ket nakurimes ti kuarta a paggatangna iti baka.

Nagpulong iti polis ni Roger Tadeja y Argel, 47, naasawaan, aggatgatang ken aglaklako iti baka (koridor), ken residente iti Barangay Refaro, San Juan, Ilocos Sur, a hinold-ap ti dua a lalaki a nagpammarang a nadadaelan ti motorsikloda idi malem ti Marso 2 ket intarayda ti kuartana.

Iti pulongna iti polis, kinuna ni Tadeja a hinold-ap ti dua a lalaki a nakasakay iti nalabaga a nakamotorsiklo ket intarayda ti kuartana a P48,000.

Kas panangisalaysay ti biktima, idi agarup 4:00 ti malem ti Marso 2, agdaldaliasat iti agpaamianan a direksion iti national highway a sakup ti Barangay Bungro ditoy nga ili a nakalugan iti motorsiklona a MCX a kolor nalabaga ket idi makadanon iti nakapasamakan ti hold-ap, pinara ti dua a lalaki a nakalugan iti nalabaga a Honda TMX ket imbagada a depektibo ti spark plug ti luganda sada simmublat iti aramienta ti biktima.

Bayat nga agbirbirok ti biktima iti mausar nga aramienta, kellaat a pinaturongan dagiti suspek iti paltog a mapapati a cal. 45 sada puersa nga innala ti P48,000.00 a nakakabil iti bulsana.

Naglibas dagiti suspek iti abagatan a direksion kalpasan ti panaghold-ap.

Nangipatulod dagiti nagresponde a polis iti flash alarm kadagiti kaparangetda a police station ken nangisayangkat iti dragnet operation ngem negatibo ti resultana.

Di pay nabigbig dagiti suspek ken no kasano nga ammoda nga adda dakkel a kuarta nga ikut ti biktima.#