Aggawidka inton Paskua

Sarita ni Danilo S. de Guzman

(Maikadua a paset)

 

“’Nang, apay kadi a nagapakayo ken ni tatang?”

“Ayna, anakko, narigat nga ilawlawag. Dumtengto lattan ti panawen a maammuanyo no apay. Kabayatanna, nasaysayaat no saanyo a pampanunoten dayta a banag!”

“Ngem karbenganmi met a maammuan, nanang, saan kadi? Addan panunot ken nakemmi ket kabaelanmin nga awaten dagiti bambanag a sumangbay. Isu a diyo koma ipaidam dayta kadakami, pangaasiyo koma, nanang. Kayatmi a maammuan…”

Immanges iti nauneg ti ina. Kasla adalem unay a taaw ti bimmatokan ti panunotna. Naikuleng. Adayo ti turong dagiti matana iti ruar ti nganga ti tawa a makindaya. Serioso ti langana, ket arignan di pay umanges.

“Sumungbatka koma, nanang, pangaasim.”

Immanges iti nauneg ti ina. Nakipinnerreng. Ket kinunana kalpasanna: “Mangliliput ti amayo. Awan serserbina a tao…”

“M-mangliliput…? Ania ti kayatyo a sawen?”

“Addan sabali nga asawana. Isu a saanyon a panunoten pay ta di ket dayta ti mangburibor kadakayo.”

“A-addan sabali nga asawa ni tatang…?”

“Dayta ti pudno, anak. Isu a  nagsinakami…!”

SINARAK met ni Myrna ti amana sadiay munisipio a pagtartrabahuanna tapno kasaritana daytoy.

“Ladingitek, anak, nagbasolak ken ni nanangyo. Ngem dagiti dadduma a pammabasolna, awan ti kinapudnona. Nupay kasta, nagbalbaliwakon bareng no mapakawannak pay.”

“Ket no pudno a nagbalbaliwkayon, apay a diyo kasarita, tatang?”

“Namin-adun, ngem dinak maawatan. Namin-adu pay a daras a kasaok iti selpon, agingga a saankon a makontak. Apay kadi?”

“Inlakonan ‘diay selponna, ‘tang, nabayagen. Awanen ti us-usarenna.”

“No kasaok met iti personal, agtinnag laeng iti panangapana kaniak. Dayta pay ti gapuna a pimmanawak iti balay, ta isu met ti sangkabagana aglalo no apaennak… a pumanawakon…”

“Ania ngamin aya dayta a panggurguraanna kadakayo, tatang? Mabalin a maammuan?”

Immanges iti nauneg ti ama. Naibakal dagiti matana iti ruar ti canteen a kadayta nga agalaskuatro iti malem. Iti suli a lamisaan ti yanda, adda pay maysa a mangmangan. Idi rugianda ti agsango itay alas tres, napnapno ti agmerienda ta dayta la ngarud nga oras ti panagmemerienda.

“Apay a saankayo nga agtimek, tatang?”

“Naisurotak iti naminsan iti maysa a pagliwliwaan dita igid ti baybay dita San Lucas. Naisurotak ta sadiay ngamin a nagbertdey ti maysa a kaopisinaanmi. Idi agawidak, nakitana nga adda lipstick iti kuelio ti polok. Sipud idin, nagatapen nga adda sabali a babai iti biagko. Saannak a kasarsarita. Apaennak no ipursarko. Agingga a napanunotko ti agpalamiis, ket nagnaedak sadiay yan da tatang ken nanang.”

Umis-isem ni Myrna a nagkuna: “Agawidka inton Paskua, tatang! Didakam koma paayen ken Ading Cles. Agawidka inton Paskua…!”

Iti biang met ni Cles, kinasaritana  ni lolana nga ina ni nanangna. Nagpakaasi ti ubing a kasao koma ti baket ti inada, ket urnosendan ti amin.

“Floring, Paskuan, apay, dika kadi makarikna iti kinakawaw iti pannakaipusingmo iti denna ni William?”

“Ay, awanen, nanang! Bay-anyon daydiay a lalaki. Awan met la ti serserbina. No awan met la ti serbina, baybay-an lattan.”

“Floring, anakko, dagiti ubbing koma ti pangigapuam. Kailiwda met ti amada. Dimo met ngarud maited wenno maep-ep dayta nga iliwda. Maawatam koma met ti riknada. Rumbeng laeng dayta ta sika ti ina.”

“Nanang, nalpasen ti amin kadakami ni William. Bay-am dagiti ubbing, ta dumtengto ti aldaw a maawatanda ti amin. Dadakkeldan, addaandan iti husto nga edad nga umawat iti naisupadi a situasion, ken makaawatdan. Naibagakon a mangliliput ti amada, nga isu dayta ti nagsinaanmi.”

“Ibagak kenka, Floring, no la ket ta agbalbaliw ni William, nasaysayaat no ikkam pay iti sabali a gundaway. Ta kasta ti pudno a kaipananan ti Paskua. Panagiinnayat. Panagpakumbaba. Iti baro a tawen, panagbalbaliw met kadagiti saan a nasayaat nga aramid, ugali, ken kababalin. Tapno marikna a sumangbay ti espiritu ti Paskua, nasken nga umuna ti panagbabawi kadagiti basbasol. Nasken ti panangpakawan kadagiti nagbasol. Ta saan a pulos a marikna ti kaipapanan ti Paskua no awan ti panagpipinnakawan. Ta ayat ti kaipapanan ti Paskua. Ti Paskua ket ayat.”

“N-nanang, nasaem ngamin unay ni inaramid ni William. Intedko ti amin kenkuana, ngem liniputannak. Saanko a karbengan dayta a banag, nanang, saan kadi? Saanko a karbengan ti maliputan. Saanko a karbengan ti agbalin a martir. No ngipen ti ingkagatna, pues, ngipen met ti ikagatko kenkuana. Ngipen iti ngipen!”

“Aglunit met ti sugat, anakko. Ngem sakbay a mapasamak dayta a panaglunit, umuna pay ti pammakawan. Ta iti kaanoman, saan nga aglunit ti sugat agingga nga awan ti pammakawan. Saan laeng a dayta bagim ti kitaem, no di ket dagiti annakmo. Kasanon no maaramid met dagiti annakmo ti agpakaloko? Imbes nga agiskuelada a nasayaat ket agbulakbolda ketdi? Wenno sabali ti masumokda, agbirokda iti pangiyaw-awananda iti aw-awitenda a babantot kadagiti kabarkadada agingga a saanmon ida a maidalan. Maiyaw-awanda. Madadael ti masakbayanda, anakko. Agpanunotka koma.  ”

(Maigibusto)