Footer

Aggawidkanto inton Paskua

Sarita ni Danilo S. de Guzman

(Maudi a paset)

 

“Nasakit ngamin ti inaramidna, n-nanang… nakasaksakit…!”

“Saanmo koma a serraan ti pusom tapno sumrek ti pannakaawat, Floring. Nasken a silulukat a kanayon ti pannakaawatmo ta iti kasta, agubbog ni ayat.”

“N-nanang…?”

“Kitaem, nakasaganakayon a mangselebrar iti Paskua. Agka-kadaeg dagiti arkos iti balayyo: krismas tri a nagtayag, nagduduma a babassit a silaw nga adda pay tokarna, addan dagiti nabungon a regalo iti sakaanan daytoy a krismas tri a nabitinan pay iti adu a babassit a Sta. Claus, nakasaganan dagiti agkakaimas a makan a saganayo inton noche buena, ikankantayo ti ragsakyo iti panagselebraryo iti pannakaipasngay ti Mannubbot. Ngem iti pusom, Floring, inaponan met iti gura ken lunod. Adda pungtot ken sakit ti nakem a di mapalusposan. Kadagiti annakmo, selebraranda ti Paskua, ngem ubbaw met ti riknada kadaytoy. Rumbeng kadi daytoy? Rumbeng kadi, Floring, anakko…? Utobem koma dagitoy nga imbagak kenka… utobem!”

Saan a nakatimek ni Floring. Saanna a maiperreng dagiti matana kadagiti mata ti inana, a kunam la no paris a lawag a nangsarut iti naadalem a danum, bumatok ti lawag, agandap ken mangsilnag iti nasipnget a tukot.

Kinuna manen ti ina: “Nasaysayaat ti mangipaay iti ayat ngem ti gumura iti daytoy a Paskua, Floring. Nasaysayaat ti agayat ngem ti gumura…!”

Saan koma a patgan ni Floring dagiti annakna iti imbagada a yuumay ti amada makinoche buena. Saanna kayat pay a silpuan ti nalpasen a naputed a segmento ti panagbiagna. Ngem uray la nagkullayaw iti insawang dagiti dua nga annakna, a dinanto met ida pabasolen no adda saan a nasayaat a mapasamak.

Dayta saan a nasayaat a mapasamak ti mangal-allia unay kenkuana. Kasanon no pumudno dagiti naisawang ni nanangna nga agpakaloko dagiti annakna?

Immanges iti nauneg. Nariknana a timbog ti luana, ngem binay-anna lattan nga agayus kadagiti pingpingna. Dinarasna ti simrek iti siledna ket nagpupok a sililimed a nagsangsangit.

Pinabasolna ni William, nga isu ti puon amin dagitoy a mapaspasamak iti pamiliada. Isu ti akimbasol. No agpakaloko dagiti annakna, isu ti akimbasol!

Nataldiapanna ti ladawan ti Nasantuan a Pamilia idi maiyanak ni Jesus iti kulluong. Limmalon ti anug-ogna.

Umno kadi ti ar-aramidenna? Ipagpagapum dagiti annakmo, kumurkurikor dayta a pammagbaga ni nanangna kadagiti lapayagna.

Madamdama pay, nairidep iti  panagsangsangitna. Nadagsen ti bagina a nakariing. Ngem addan lawag iti panunotna, ta nakaikeddengen. Tinaliawna pay naminsan ti ladawan ni ubing a Jesus a naipasngay iti kulluong.

Nangtung-ed lattan a di pay immisem idi indukit manen dagiti annakda a sipapalubos koma nga umay makinoche buena ti amada. Naragsakan dagiti annakna ket dagusda a tinawagan ti selpon ti amada.

Nadagsen ti barukong ni Floring, ngem awanen ti maaramidanna. No ar-arigen, ti bola nga ay-ayam ket adda kadagiti dakulapna—isu ti agi-keddeng no agpakaloko dagiti annakna wenno saan? Siempre, isu ti ina, ket kaykayatna a saan a maiyaw-awan dagiti annakna. Nasken nga awatenna ti amin, ania ngarud.

Alas otso iti rabii idi dimteng ni William a nakalugan iti motorsikona. Sumagmamano pay nga oras ket noche buena. Makumikom nga agluto ni Floring iti kusina. Siraragsak a kimmablaaw ni William iti naragsak a Paskua, ngem tung-ed laeng ti insubadna a di pay immisem.

Inkeddeng ni William ti nakipatpatang kadagiti annakna iti salas. Agingga a dimteng ti pannangan kalpasan ti tengnga ti rabbi.

Mapaliiw dagiti annakda a timpuaren dagiti isem kadagiti bibig ni Floring lalo kadagiti angaw ni William. Agingga a napuotan laengen da William ken Floring a dudduduadan  iti kusina. Idi usisaen ni Floring dagiti annakna, addan dagitoy kadagiti siledda.

“Addan dagiti ubbing iti siledda. Maturogdan…”

Ngem iti kaanoman, saan a maturog ti ayat—lalo ti ayat a tinarimbangon ta dandanin naituglep gapu iti inna pana-gindurog iti kalaksidan ti pinagsinggalot ti dua a puso. Saan a maturog ta inda manen sanguen ti baro nga agpang ti biag, ken mangnamnama nga iti isasangbay ti nadawel a bagyo iti sumaruno ket nanamenda ti sirnaat. Agtultuloy nga agtiktak ti orasan a kas iti agnanayon a tiktak ti anges ti biag.

Kadagiti agassawa a Floring ken William, iti dayta a kanito, dida nagawidan ti nagginnarikgik ken naginnarakgak ken nagginnantil iti inda pagtungtungtongan. Napuotanda laengen ni Myrna a naibaskag iti ridaw ti kusina.

“Dikay pay la maturog, nanang, tatang?”

“Ania ti orasen aya?” dinamag ni Floring idinto a linukip ni William ti selponna a pangkitaannna iti oras.

“Alla, pasado alaskuatron a, ‘nang.”

Maar-arakkatot a nagtignay ni Floring: “Tulongannakon nga agisimpa, lakay, ta maturogta metten. Di met napuotanen a parbangon gayamen…”

“’Nang, ‘tang, bay-anyon, siakon ti makaammo ditoy. Inkay lattan maturog. Meri krismas kadakayo nga agpadpada…” Ket siraragsak a nangbisong kadagiti dadakkelna.

Nagtaraok dagiti kawitan a mangipakpakdaar iti baro nga agsapa iti kaaldawan ti Paskua. Ngem kadagiti agassawa a William ken Floring, ammoda itan nga ubbaw ti kaipapanan ti krismas tri, dagiti agkakaimas a taraon iti noche buena, dagiti narabuy a regalo,  ken dadduma pay a ladawan ti sagut no iti barukong ket inaponan ti gura ken lunod. Adda panagbiddut ngem maitutop iti mamakawan. Ta ayat ti kaipapanan ti paskua…#