Footer

Aggibus koman ti gubat tapno awanen maipatli pay a biag: biuda ti soldado a nagudas iti Marawi City

GALIMUYOD, Ilocos Sur – Aggawid koma ni Philippine Army Corporal Elmer Macliing Anno ditoy nga ili inton Hulio 30 tapno maki-pagselebrar iti panagkasangay ni Charm Emerald, 3, ken iti pannakapabuniag ni Caitlen Elise, 1, ngem dinan matung-pal daytoy a karina agsipud ta maysa kadagiti soldado a nagudas iti rupak iti nagbaetan ti tropa ti gobierno ken ti Maute terror group iti Marawi City idi Mayo 23.

Kinuna ni Carmi, 28, biuda Cpl. Anno, a naituding nga agbakasion ti asawana iti dayta nga aldaw tapno selebraranda ti maikatlo a tawen a panag-kasangay ni Charm Emeralda a maigiddan iti panagbuniag ni Caitlen Elise.

Miembro ti 4th Light Reaction Company ti Light Reaction Regiment of the Philippine Army, maysa ni Anno kadagiti soldado a naibaon iti Marawi City idi Mayo 23 tapno baludenda ni Isnilon Hapilon, lider ti mapagbutbutngan nga Abu Sayyaf, ngem nagtungpal a nakarangetda dagiti armado a miembro ti Maute group.

Gapu iti daytoy nadara a ranget, indeklarar ni Presi-dente Rodrigo Duterte ti martial law iti Mindanao.

Iti daytoy nga engkuentro, maysa ni Anno kadagiti nasugatan ngem saanda a dagus a naarayat dagiti tropa ti gobierno agsipud ta dida makastrek iti nadakamat a lugar gapu iti kaadda dagiti sniper ti Maute group.

Kalpasan ti clearing opera-tion idi Mayo 24, naibiahe babaen iti helicopter dagiti nasugatan a soldado para iti pannakataming dagiti sugatda iti ospital.

Naammuan ni Carmi ti pannakadunor ti asawana ket nagbiahe a nagpa-Manila tapno kitaenna ti kasasaad daytoy ngem bayat ti kaadda-na iti dalan, nakaawat iti text message a pimmusay ni lakayna idi agarup 1:54 ti malem ti Mayo 27.

Kinuna ni Carmi a kaudian a panagpatangda ken ni lakayna idi Mayo 22 a nangkablaawan daytoy iti “good night” ken nangkid-dawanna ti “panagkararagna para iti Marawi”.

Kinuna ni Carmi a mana-ngipateg nga asawa ken responsible nga ama ni lakayna, ket adda latta men-sahe ti asawana wenno tuma-wag no adda paskenda.

Kinunana nga inyunay-unay pay ni lakayna a gumatang iti baro a bado ni Caitlen nga usarenna iti panagkasangayna ngem ti nakaladladingit ta natay daytoy iti pay met aldaw ti panagkasangay ti inauna nga anakda.

Idi Hunio 8, 2017, naipa-ayan iti hero’s burial ni Cpl. Anno iti sementerio ti Galimuyod babaen ti tulong ti nasional ken lokal a gobierno.

Malaksid iti kuarta a tulong, nangipaay pay ti nasional a gobierno iti scholarship para iti panagadal dagiti annak ti natay a soldado agingga iti panagturposda iti kolehio.

Kinuna ni Carmi a mada-man ti pannakaproseso dagiti regular a benepisio nga ipaay ti nasional a gobierno para kadagiti nagudas a soldado.

Idi Hunio 17, immawat pay ni Carmi iti P50,000.00 a tulong manipud iti Air Materiel Wing Savings and Loan Association Inc. (AMWSLAI) ti Philippine Air Force ken manipud iti Hannah’s Beach Resort and Convention Center.

Kabayatanna, mangipaay met ti gobierno probinsial ti Ilocos Sur iti posthumous Father Jose Burgos award ken ni Cpl Anno gapu iti impamatmatna a kinabannuar ken kinatured iti pannakirupakda iti Marawi City.

Kinuna ni Teodoro, ama ni Cpl. Anno, nga ubing unay a natay ti anakna ngem maipag-pannakkelna daytoy gapu ta imbuisna ti biagna para iti pagilian.

Kinuna ni Carmi a dina pay naan-anay a maaklon a natayen ti asawana ngem masapul nga agtalinaed a natured para kadagiti annakna.

Mangnamnamaak nga aggibusen iti mabiit ti rupak iti Mindanao tapno awanen ti maipatli pay a biag nga awan kaes-eskanna,” kinunana. (Salvador A. Espejo/Karaman ti report ni Freddie G. Lazaro, PIA I)