Agimon nga OFW nagpangta a pumatay

GALIMUYOD, Ilocos Sur – Gapu iti nakaro nga imonna, pinangtaan a patayen ti  maysa nga Overseas Filipino Worker (OFW) ti maysa a lineman ti ISECO a suspetsana a lalaki ni baketna.

Nagpulong iti polis ni Reggie Dacanay y Catbagan, 35, naasawaan, ken residente iti Barangay Bitong, Galimuyod, a pinangtaan a patayen ni Lucky Tungbaban, 32, naasawaan, OFW, ken residente iti Barangay San Vicente, Galimuyod iti mismo a balayna idi agarup 9:00 ti rabii ti Nobiembre 17.

Mapapati a nakainom ken armado iti kutsilio ni Tungbaban idi napan iti balay ni Dacanay sana pinangtaan iti “Uray mabaludak basta mapatay ka!”

Mapapati a kinugtaran pay ti suspek ti ridaw ti balay ni Dacanay a nakabuongan ti sarmingna.

Kinuna ti biktima nga agsuspetsa ni Tungbaban nga isu ti lalaki ni baketna.

Naidanon ti pulong ni Tungbaban iti barangay captain para iti maiyanatup nga aksion.#