Agina, dinungpar ti traysikel

GALIMUYOD, Ilocos Sur – Nayospital ti agina gapu iti panangdungpar kadakuada ti maysa a traysikel iti kalsada a sakup ti Barangay Mabayag ditoy nga ili idi Abril 20.

Nagsagrap iti dunor iti nadumaduma a paset ti bagina ni Marites Balocating, 26, naasawaan, residente iti Brgy. Nagsingcaoan, idinto a nadunor ti ulo ti anakna, agtawen iti maysa ken lima a bulan.

Mapapati a bimmallasiw ni Balocating nga ubbana ti anakna iti kalsada ket aksidente a nadungpar ti Honda TMX 155 a minaneho ni Jackson Aglit y Madamba, 17, baro, agbasbasa iti kolehio ken residente iti Barangay Mabayag.

Nagareglo ti ama ti biktima ken ni Aglit kalpasan nga inako ti naud-udi dagiti magasto iti pannakayospital dagiti biktima.#