Agina, nadunor iti aksidente

CANDON CITY – Nadundunor dagiti agina idi naidungpar ti naglugananda a traysikel iti steel railings iti igid ti kalsada nasional a sakup ti Barangay Tablac idi Mayo 15.

Naitaray iti Candon General Hospital da Rica Dato, 26, ken residente iti Langlangca 2nd ditoy siudad, ken ti anakna a ni Nathan, para iti pannakaagasda gapu iti napasamak nga aksidente a nakainbolbaran ti naglugananda a traysikel a Rusi.

Segun iti report, agpaabagatan ti traysikel a minaneho ni Heraldson Brioso, residente iti Bagani Campo iti national highway a sakup ti Barangay Tablac idi mapapati a nadadael ti cross over ti sidecar ti traysikel ket saan a nakontrol ti drayber ti manibela a puon ti pannakadungpar daytoy iti steel railings iti igid ti kalsada ken nakasugatan dagiti agina.#