Agina, nanabtuog iti buy bust operation

VIGAN CITY – Napalab-ogan babaen iti drug operation ti maysa a drug personality ken ti menor de edad nga anakna a nagresulta iti pannakakumpiska dagiti operatiba iti droga ken drug paraphernalia iti ikutda sadiay Barangay P. Tamurong, ditoy nga ili idi malem ti Mayo 13.

Positibo ti insayangkat dagiti nagtitipon nga elemento ti PDEA ISSET, PAIDSOTG ken Caoayan Police Station a buy bust operation maikontra kada Divina Gracia Ramos y Tabarrejo, 33, naasawaan, negosiante; ken ti anakna a menor de edad, estudiante, agpada a residente iti Barangay Sagsagat, San Ildefonso, Ilocos Sur a nagresulta iti pannakakumpiska kadagiti agina iti maysa a heat sealed plastic sachet a naglaon iti mapapati a shabu, selpon a Samsung, 2 a disposable lighters, P400.00 iti nadumaduma a denominasion, dagiti marked money a dua a sag-P500.00 nga addaan serial number AC176457 ken AC176448, ken maysa a P1,000.00 nga addaan serial number MD680754 ken ti motorsiklo a Euro a lugan dagiti suspek.

Sakbay ti transaksion, nagpuesto dagiti operatiba iti asideg iti lugar a pagginnatangan-paglinnakuan ti poseur-buyer ken dagiti suspek.

Apaman a nakumpleto ti transaksion, nagsenias ti nagpammarang a kustomer ket dagus a ginammatan dagiti operatiba dagiti agina.

Naikustodia dagiti suspek iti Caoayan Police Station para iti inbestigasion ken umisu a disposision iti kaso idinto a naipatulod iti provincial crime laboratory ti mapapati a shabu a nakumpiska iti ikutda para iti pannakaeksamenna.

Kuna ti polis a nairaman ni Ramos iti drug watch list ti San Ildefonso, Ilocos Sur.

Kabayatanna, birbiroken dagiti polis ti drayber ti maysa a delivery truck a naglibas kalpasan a mapapati a nasukalan nga adda ikutna a droga idi bigat ti Mayo 11.

Nainaganan ti suspek a ni Joel Marata Ang, 41, naasawaan, ken residente iti San Antonio, Buhangin, Davao City.

Iti report manipud iti polis ti Vigan City, bayat ti panag-inspeksion ni Rolando Villegas Madrid, 41, naasawaan, guardia iti Philip Morris International Fortune Tobacco Corporation ken residente iti Barangay Becques, Tagudin, Ilocos Sur, nasukalanna ti maysa a box iti tugaw ti drayber a naglaon iti innem nga aluminum strips; maysa nga improvised aluminum foil tooter; 2 lighter; 3 small rolled aluminum foil; ken 2 a naluktan a bassit a plastic sachet a mapapati nga addaan iti drug residue.

Naipaima dagitoy kadagiti nagresponde a polis ken naipatulodda iti Provincial Crime Laboratory Office, Camp Pres. Elpidio R Quirino, Bulag, Bantay, Ilocos Sur, para iti pannakaeksamenda.#