Agina, tinagtabat ti kalugaranda

SAN EMILIO, Ilocos Sur – Dati a susik ti mapapati a nakagapu iti panangtagtagbat ti maysa a lalaki iti kalugaranna a babai ken ti anak daytoy idi bigat ti Disiembre 26.

Iti report manipud iti polis ditoy, magmagna da Renia Gallardo y Brillantes, 35, naasawaan ken residente iti Cabaroan, ditoy nga ili, ken ti anakna a ni Sherry Mae, 9, ket idi addadan iti Langbayan, Cabaroan, kellaat a dinarup ida ni Romeo Balin-ao, 45, baro, ken kalugaranda.

Nagsagrap iti sugat ni Renia iti nadumaduma a paset ti bagina idinto a nasugatan met ti agong ni Shery Mae ket naitarayda iti Candon General Hospital, Candon City para iti pannakaagasda.

Inaresto dagiti polis ti suspek ket adda itan iti kustodia ti police station. Narekobre met dagiti polis ti armas nga inaramat ti suspek.

Maisagsaganan ti kaso a frustrated murder maikontra ken ni Balin-ao.#