Agindeg iti coastal barangays, maam-amak pannakakurokor ti shoreline

STA. CATALINA, Ilocos Sur – Maam-amak dagiti agindeg iti coastal barangays ditoy nga ili gapu iti mapaliiw a yaasideg ti danum iti kabalbalayan.

Segun iti maysa a konsehal, adun ti immasidegan ti danum iti daga gapu iti pannakakurukor ti shoreline maigapu iti panagreggaay dagiti darat a trensera iti baybay.

Napaliiw daytoy itay nabiit a kapigsa ti angin a nakaigapuan ti panagdawel ti baybay ket nakadanon ti danum iti kakandarumaan.

Kanaig daytoy, indagadag ni Konsehal Expedito Rapanut a maikkan iti prioridad a mapunduan ti pannakaipasdek iti bangen wenno lapped iti shoreline tapno malapdan ti yaasideg ti danum iti kabalbalayan.#