Agindeg iti Sugpon, nagsanay iti panagaramid iti tinapay

SUGPON, Ilocos Sur – Manamnama a kalpasan ti panagsanay dagiti agindeg ditoy nga ili, makaaramiddanton iti tinapay ken pastry a mailako ditoy nga ili a saanen nga aggapu pay iti sabali a probinsia.

Nakitulag ni Mayor Fernando Quiton kadagiti ahensia ti turay a pakaibilangan ti TESDA, DOLE, DTI ken DSWD para iti pannakairusat daytoy a gannuat a mangipaay iti pagsapulan kadagiti residente ditoy nga ili.

Kanaig daytoy, maisayangkat ti maysa a panagsanay kadagiti napili a residente para iti panagaramid iti tinapay ken pastry.

Nangted ti DSWD iti oven nga aramaten dagiti lumugar iti panagaramidda iti tinapay ken pastry.

Sakbayna, aggapu pay la iti Benguet dagiti mailako ditoy nga ili a tinapay.#