Agipulong agtaktakaw koriente, naisingasing magunggonaan

VIGAN CITY – Insingasing ni Konsehal Benjo Verzosa ti panangited ti Ilocos Sur Electric Cooperative iti gunggona kadagiti agipulong kadagiti agtaktakaw iti koriente tapno bumaba ti system loss ti kooperatiba.

Dimmatag dagiti opisial ti ISECO iti sangguniang panlungsod ditoy itay nabiit tapno lawlawaganda ti system loss a maipabpabaklay kadagiti agus-usar iti koriente.

Segun ken Lawrence Severo ti ISECO, 13% laeng ti maipalubos a marekobre a system loss ti kooperatiba ket no limbes daytoy, ibaklayen ti kooperatiba.

Nadamag pay bayat ti session no ania ti kategoria ti ISECO, no government-owned wenno pribado a korporasion ngem saan a nalawag ti sungbat ti pannakabagi ti ISECO.#