Footer

Agireserba iti parking space kalsada ti siudad ti Vigan, maparitan

VIGAN CITY – Saanen a ma-balin ti agireserba iti pagpar-kingan kadagiti motor a behikulo  kadagiti kalsada ditoy siudad, daytoy ti bugas ti Ordinance No. 18, series of 2013 nga inapro-baran ti sangguniang panlungsod ken pinirmaanen a linteg ni Mayor Eva Marie S. Medina.

Kas sagudayen ti nasao nga ordinansa, awan ti asinoman a mangiparit iti pannakaaramat ti bakante a paset dagiti kalsada iti siudad a naituding a pagpar-kingan, malaksid dagiti lugar a naituding a pagparkingan dagiti public utility vehicles ken behikulo a guyoden ti kabalio wenno kalesa.

Kasta met nga awan ti asinoman a mangireserba iti paset ti kalsada iti siudad wenno dadduma pay a publiko a kalsada para iti bukodna nga eksklusibo a pagparkingan.

Iparit pay ti ordinansa iti asinoman, sole proprietorship, partnership, corporation, firm wenno aniaman a kita ti pasdek-negosio nga agikabilda iti signboard wenno marker a nakailanadan ti “ Reserved,” “Reserved for owner/ Manager/ director/ Trustee/ President/Officials”, “Reserved for Customers” or “For Customers Use Only” ken wenno dadduma pay nga umasping a balikas iti aniaman a paset dagiti kalsada iti siudad.

Ti multa ti asinoman nga aglabsing iti ordinansa: 1st offense – P200.00, 2nd offense – P500.00, ken 3rd offense – P1,000.00.

Mamulta met ti asinoman nga owner, proprietor, officers, directors or trustees dagiti business establishments nga agsalungasing kadagiti probiso ti ordinansa iti: P200.00 para 1st offense, P1,000.00 para iti 2nd offense, ken P5,000.00 para iti 3rd offense.

Kapaliiwan a dagiti akinkukua dagiti pasdek ti agar-aramat iti kalsada iti asideg a pagparkingan dagiti luganda.#