Agiwarwarnak ti Pangasinan, nangabak iti dua nga award iti 2014 Bright Leaf Journalism Awards

MANILA – Dua a gunggona ti inabak ti maysa nga agiwarwarnak ti Pangasinan iti 2014 Bright Leaf Journalism Awards a naangay iti Sofitel Plaza itay nabiit.

Inyalat ni Gabriel Cardinoza, Pangasinan-based a reporter ti Philippine Daily Inquirer, ti Tobacco Story of the Year babaen ti sinuratna a feature story a naipablaak iti Philippine Daily Inquirer a napauluan “Pangasinan farmers pin hopes on tobacco” ken ti Agriculture Story of the Year babaen ti “Carabao vanishing in Pangasinan”.

Daytoy ti maikadua a gundaway a nangabak ni Cardinoza iti Bright Leaf Award. Idi 2012, napili ti artikulona a “‘Weather-proof Fish Cage seen as Savior of Aquaculture Industry” a Best Agriculture Feature Story.

Kabayatanna, inyalat da Cherry Ann Lim ken Liberty Pinili ti Agriculture Story of the Year babaen ti “Fish in Troubled Waters” a naipublikar iti Sun Star Cebu. Inyalat pay ni Lim ti Agriculture Story of the Year-Regional babaen ti “Bug slay, nature’s way”.

Inyawid met ni Mauricio Victa ti Tobacco Photo of the Year nga addaan iti caption a “Leaves of Gold” a naipablaak iti Business Mirror idinto nga inabak Harley F. Palangchao ti Agriculture Photo of the Year babaen ti “Frostlandia”.

Immawat dagiti nangabak iti P50,000.00 cash prize, IPad mini ken tropeo ken Asian Cruise.

Inrusat ti Philipp Morris Philippines Manufacturing Inc. (PMPMI) ti Bright Leaf Agriculture Journalism Awards idi 2007.

Segun ken ni Bayen Elero-Tinga, external affairs director ti kompania, daytoy a tawen ti kaaduan ti bilang ti entries iti walo a tawen a pakasaritaan ti Bright Leaf Awards kalpasan a nangisayangkatda kadagiti roadshows kadagiti kangrunaan nga agricultural regions iti sapasap a pagilian.#