SAN ESTEBAN, Ilocos Sur – Dua a mangngalap nga agkabsat ti nagkatangkatang iti taaw iti  nasurok uppat nga oras kalpasan a napattog ti bilogda gapu iti dakkel a dalluyon.

Kinuna da  Rodelio Barrey, 44,  ken ni Rodrigo Barrey Jr., 43,  ken agpada a residente iti barangay Apatot ditoy bayat ti eksklusibo nga interbio kadakuada ti DZTP Radio Tirad Pass ken Tawid News Magasin a dakkel a pagyamananda iti Namarsua iti pannakaisalakanda.

Segun iti agkabsat, timmapogda iti taaw iti 4:30 ti parbangon ti Enero 28, Domingo, ngem iti agarup alas 6:30, napattog ti  bilog ni Rodelio kalpasan a  dinuprak ti dakkel a dalluyon.  

Pinanggep ni Rodrigo nga alawen ti kabsatna ngem napugsat ti lubid ket napattog metten ti bilogna.

Kinuna ni Rodrigo nga inikkatda dagiti pasaplak ti bilogda ket daytoy ti nagbalin a patawda.  

Manipud alas 7:00 iti bigat agingga iti alas iti 11:30 iti aldaw a tumtumpawda lattan iti kabaybayan agingga a nasarakan ida dagiti padada a mangngalap.

“Nagkarkararagkami tapno maispalkami,” kinuna dagiti agkabsat.