Agkabsat a timmagbat iti tanod, nakasuan

CABUGAO, Ilocos Sur – Naipila iti korte ditoy ti kaso maikontra iti agkabsat a timmagbat iti maysa a barangay tanod itay nabiit.

Napilaan iti kaso a frustrated murder da Jose Torda, 54, ken Eddie Torda, 42, agkabsat, agpada nga agnaed iti Lapting, San Juan, Ilocos Sur, gapu iti panangtagbatda ken ni Expedito Someja, barangay tanod.

Inyetnag ti korte ti P200,000 a piansa tunggal maysa para iti temporario a pannakawayawayada.
Segun iti inbestigasion ti polis, adda saan a panagkinnaawatan dagiti agkabsat a Torda bayat ti panagiinomda a kaduada ti sumagmamano a kalugaranda ket napan naganawa ti biktima.

Ti biktima ti nagdas-alan ti pungtot dagiti agkabsat ket tinagtagbatda a puon ti nakayospitalanna.#