Agkabsat, karaman a nauram

SALCEDO, Ilocos Sur – Karaman a napuoran ti agkabsat iti dimmapo a pagtaengan idiay Balidbid ditoy nga ili idi Septiembre 27.

Dandani saanen a mailasin da Stephanie Ronquillo, 15, ken Ryan Nicolas Ronquillo, 10, gapu iti pannakaksetda idi mairuar dagiti bombero iti nauram a pagtaenganda.

Iti pannakaisurat daytoy, kasla mapukpukaw pay laeng ti nasimbeng a panunot ti amada, ni Nelson, gapu iti saanna a pannakaisalakan kadagiti annakna.

Agpada a nakalasat da Nelson ken ni Ruby nga asawana.

Nauram ti dadduma a paset ti bagi ni Nelson iti panang-padasna a mangisalakan kadagiti annakna.

Naammuan iti inbestigasion a matmaturog dagiti agkabsat iti maikadua a kadsaaran idi mauram ti balay.

Pinadas ti ama nga inruar dagiti annakna babaen ti panangdadaelna iti iron grills ti tawa iti maikadua a kadsaaran ngem iti agawana a rimmuar, naisab-it ti sakana.

Nairuar met laeng ni Nelson ti asawana ngem idi sublienna dagiti annakna, awandan iti nangpanawanna kadakuada. Mapapati a nagsubli dagiti ubbing iti kuartoda ket ditoy ti nakakulonganda.

Pinadas ti ama ti sumrek iti uneg ngem dakkelen ti apuy ken nakaron ti asuk ket nasilaban ti bagina.

Segun ken ni Senior Fire Officer 1 Jason Bagurio, arson investigator, dakkelen ti apuy idi dumteng dagiti bumbero.

Naammuan met ken ni Barangay Captain Roel Ronquillo, uliteg dagiti biktima, nga agalas dose iti rabii idi nadlawan ti maysa a kaarrubada a mapupuoran ti balay dagiti biktima.

Kinunana a nangegda pay ti panagpaarayat dagiti biktima ngem awan ti naaramidanda agsipud ta nalakuben ti balay iti apuy.

Kinuna ni Bagurio a nadaras a nagkayamkam ti apuy ags-ipud ta light materials ti pagtaengan. Mapattapatta a short circuit ti nagtaudan ti uram.#