Agkabsat, nagriri, 1 natay

VIGAN CITY  –  Gapu iti dida panagkinnaawatan, dua nga agkabsat nga armado iti buneng ken tubo ti nagkinnabil a nakatayan ti maysa kadakuada.

Binigbig dagiti polis ti biktima a ni Ronald Pajarillo y Rapacon, edad 31, baro ken agnaed iti Brgy Ayusan Norte iti daytoy a siudad idinto a suspek ti  inauna a kabsatna nga agnagan iti Melecio Pajarillo y Rapacon, edad 38, addaan asawa ken agnaed iti isu met la a barangay.

Segun ti imbestigasion dagiti polis, sakbay ti insidente, naggiinom ti suspek ken kakaduana idi alas 9:00 ti rabii ti Agosto 16.

Nalpasen ti inom idi sumangpet ti biktima ket nagpaala iti arak a nagsanguanda.

Mapapati nga adda di nagkinnaawatan dagiti dua ket innala ti biktima ti bunengna nga agatiddog iti 17 pulgada sana tinagbat ti suspek. Nangala met ti suspek iti tubo a landok nga agatiddog iti 29 pulgada ket daytoy ti impalekna iti ulo ti kabsatna.

Intaray dagiti nagresponde a polis ti biktima idiay Gabriela Silang General Hospital ngem indeklara ti doktor a nangtaming kenkuana a dead on arrival.

Inaresto met dagiti polis ti suspek a nasugatan ti kannigid a pattugangan ken pasiraw-at a ramayna.#