Agkakabsat, nagriringgor, 2 nabagsol

CABUGAO, Ilocos Sur – No nalaokanen ti dara iti arak, nakullaapanen ti panunot ket agdinnangranen uray agkakabsat.

Napasamak daytoy sadiay Sta. Cruz idi Agosto 8 ken Cabugao, Ilocos Sur idi Agosto 12.

Idi agarup 10:30 ti rabii ti Agosto 12, napasamak ti maysa a pammagsol sadiay Barangay Quezon, Cabugao, Ilocos Sur no sadino a maysa a Domingo Somero y Corpuz, 63, baro, drayber, ti binagsol ti kabsatna a ni Jimmy Somera y Corpuz, 49, baro, laborer, residente met laeng iti nadakamat a barangay.

Segun iti report, agpada a nakainom dagiti agkabsat ket naparnuay ti dida panagkinnaawatan iti uneg ti balayda.

Mapapati a nangala iti kutsilio ni Jimmy sana binagsol ti tian ken makannigid a takiag ti kabsatna a ni Domingo.

Naitaray ti biktima iti Suero General Hospital para iti pannakaagas dagiti sugatna idinto a naikustodia ti suspek iti police station para iti umisu a disposision.

Mapapati nga adda dati a susik dagiti agkabsat ket ad-adda a kimmaro idi agpadada a nabartek.

Kabayatanna iti sabali a pammagsol a napasamak iti Sta. Cruz idi Agosto 8, agpada met a nakainom dagiti agkabsat a Rommel Ruiz y Lipadan, 34, baro, mannalon, ken ni Ramon Ruiz y Lipadan, 27, baro, mannalon, agpada a residente iti Barangay Babayoan, Sta. Cruz, Ilocos Sur, idi nagringgorda a nagtungpal iti panangbagsol ni Ramon ken ni Rommel.

Kas maibatay iti report, kagapgapu dagiti agkabsat iti inuman iti balay ti kasinsinda ket idi nakasangpetda iti balayda, naaddaanda iti nabara nga argumento a nagtungpal iti panagkabilda a dua.

Nangala ni Rommel iti bolo idinto a nangpidut met ni Ramon iti kutsilio ket daytoy ti imbagsolna iti namitlo a beses iti bagi ti kabsatna.

Intaray ti pamiliana ti biktima iti Sta. Lucia District Hospital sa naiyalis iti Candon City Hospital para iti pannakaagasna.

Boluntario met a simmuko ti suspek iti polis ket naikustodia para iti dokumentasion ken umisu a disposision.

Saan a narekobre ti kutsilio a naaramat iti pammagsol.#