Agkakasupanget iti politika, nagtitipon para iti urnos ken talna ti Abra

BANGUED, Abra – Iti umuna a gundaway, nagtitipon dagiti agkakasupanget a politiko iti napalabas nga eleksion tapno irusatda dagiti addang para iti pannakatagiben ti urnos ken talna iti daytoy a probinsia.

Indauluan ni Gov. Eustaquio Bersamin, Congresswoman Cecilia Luna, Police Chief Supt. Eugene Martin, PNP Director ti  Cordillera Administrative Region (CAR), ken ti Philippine Army a nakabase iti Abra ti pannakabukel ti Provincial Peace and Order Council a nakipartisiparan dagiti mamayor dagiti nadumalduma nga ili ditoy.

Dinayaw ni  Bersamin ti positibo nga aksion dagiti padana a kabutbutos nga opisial, kangrunaan dagiti mamayor a saanda a kapartiduan gapu iti pannakimaymaysada para iti pannakatagiben ti linak ken talna iti probinsia.

Karaman iti immatendar  ni Tineg Mayor Edwin Crisologo  a nangipasimudaag iti interesna iti patangan iti panagbalin a natalna ti Abra.

Iti napalabas nga eleksion, ni Crisologo ti maysa kadagiti nangabak a mayor a kadua ni  naabak a Gobernador Vicsyd Valera.

Napapatay ti asawa ni Crisologo bayat ti pannakabilang dagiti butos.

Iti nasao a meeting, impresentar ken inaprobaran ti PPOC ti naiproponer a provincial integrated community public safety plan. Iti daytoy a plano, tumulong tunggal ahensia ken local government unit kadagiti autoridad iti pannakatagiben ti linak ken talna kadagiti amin nga ili iti probinsia.

Agtultuloy met ti panagkinnamayyet ti PNP ken Philippine Army tapno bumaba ti kriminalidad ken insurhensia ditoy.

Maysa a pakaseknan nga inruar dagiti immatendar a mamayor ti problema ti boundary dispute iti nagbabaetan ti ili a Boliney, Manabo, Tubo ken Luba.

Indagadag ni Luna a ti koma pannakapadur-as ti bukodda nga ili ti prioridad nga ikkan iti imatang dagiti mamayor.

"Sapay koma ta ti nabukel a Peace and Order Council ti kabarbaro nga administrasion ti agserbi a pangrugian iti economic development ken panagbalin ti Abra a peaceful province," kinuna ni Martin. (Jane Ballad)