Agkasinsin, binagbagsol ti katulong

STO. DOMINGO, Ilocos Sur – Ania laengen ti kinagura unay ti maysa a katulong kadagiti agkasinsin a babbai ta nagpapasanna ida a binagbagsol?

Daytoy ti anggulo a kitkitaen dagiti inbestigador iti agtultuloy a panagpalutpotda mainaig iti pannakapapatay da Rowena Bugarin y Tabarnilla ken ti kasinsinna a ni Vanesa Bugarin y Matias, agpada nga agtawen iti 19, estudiante, ken residente iti Sitio Bagumbayan, Barangay Paras, ditoy nga ili, idi agarup 9:20 ti rabii ti Disiembre 5.

Kas maibatay iti autopsia, nagsagrap ni Rowena iti sangapulo ket uppat a bagsol idinto a 15 a bagsol ken ni Vanesa.

Kanaig daytoy, naipilan ti kaso a double murder maikontra ken ni Lord Jim Bilen y Delmo, 29, katulong, taga-Barangay Mabilbila, Santa, ngem agdama nga aggigian iti Sitio Bagumbayan, Barangay Paras.

Segun iti report manipud iti polis ditoy, immarayat ni Edito Bugarin, 54, uliteg dagiti biktima ken kaarrubada met laeng, idi nangegna ti panagik-ikkis nga agpapaarayat ni Rowena ket nakitana laengen dagiti kaanakanna a nadigosda iti bukodda a dara.

Naitaray dagiti biktima iti Northside Doctors Hospital, Barangay Guimod, Bantay, Ilocos Sur ngem saandan a naiyabot ti biag dagitoy.#