Agkasinsin, natay iti aksidente

SAN ILDEFONSO, Ilocos Sur – Saanen a naiyabot ti biag dagiti agkasinsin iti ospital gapu kadagiti grabe a sugatda gapuanan ti panangdungpar ti maysa a truck iti motorsikloda iti national highway a sakup daytoy nga ili idi rabii ti Enero 15.

Dead on arrival iti Metro Vigan Cooperative Hospital da Melandrino Roa, Jr. y Versoza, 18, baro, ken ni Christian de Vera y Verzosa, 18, baro, agpada a residente iti Barangay Camestizoan, Sto. Domingo, Ilocos Sur gapu iti dunorda iti ulo ken nadumaduma a paset ti bagida.

Segun iti inisial nga inbestigasion dagiti polis, manipud iti barangay road, mapapati a kellaat a nagderetso iti kalsada nasional ti motorsiklo a nagluganan dagiti biktima ket saan a napakadaan ti nagmaneho iti Isuzu truck a ni Vincent Baltazar y Agustin, 27, naasawaan, ken residente iti Barangay 42 Apaya, Laoag City, a puon ti pannakadungparna kadakuada.

Saan a nakaaruat iti helmet dagiti biktima.

Iti pannakaisurat daytoy, nakakustodia ti drayber ti truck iti police station ditoy nga ili.#