Footer

Agkayong, nagduelo; agpadada a nagudas

SANTIAGO, Ilocos Sur – Kasla eksena iti pelikula idi panawen dagiti koboy iti Wild Wild West ti napasamak iti Barangay Al-aludig, ditoy nga ili treinta minutos sakbay ti isasangbay ti baro a tawen.

Iti report a dimmanon iti police station ditoy, agpada a natay ti agkayong kalpasan a nagdueloda iti paltog gapu iti panagringgorda bayat ti panaggiinomda a pangselebrar iti asidegen nga idadanon ti baro a tawen.

Nainaganan dagiti nagpinnaltog a da Marcelino Peralta y Corpuz, 60, naasawaan, ken ni Fernando Corpuz y Escritor, 41, agpada a mannalon ken residente iti nadakamat a lugar.

Naammuan iti inisial nga inbestigasion dagiti polis a madama ti panaggiinom da Fernando ken sumagmamano a kakaduana iti balay ti maysa nga Ambong Peralta idi kellaat a nagparang ni Marcelino ket naparnuay ti nabara nga argumento iti nagbaetanda.

Agpada a nangasut iti paltog dagiti dua sada nagpinnaltog, ala-koboy style, ket agpadada a nadalutaytay.

Naitaray ni Marcelino iti Candon City Hospital idinto nga iti St. Martin de Porres Hospital iti met laeng Candon City ni Fernando ngem agpadada a naideklara a dead on arrival babaen ti doktor a nangtaming kadakuada.

Segun iti polis, dati a susik ti motibo ti panagpinnaltog dagiti agkayong.#