Agketong iti Candon, bimmaba ti bilangda

CANDON CITY – Dakkel ti bimmabaan ti bilang dagiti agketong a residente ditoy siudad, segun iti City Health Office Leprosy Eradication Coordinator.

Kinuna ni Grace Ragandap, CHO Leprosy Eradicatioin Coordinator a bimmassiten ti bilang dagiti agsakit iti ketong ditoy siudad gapu iti panagbarbarangayda a nagbirok kadagiti addaan iti kastoy a sakit.

Inlawlawag ni Ragandap a nabayagen nga  isaysayangkat ti opisinada daytoy a programa ket adun ti naagasan nga agketong.

Kinunana nga ad-adu koma pay dagiti naagasan no di sulpeng dagiti dadduma ta isardengdan ti agpaagas no makitada nga awanen ti rumtab, a di koma rumbeng a maaramid.

Malaksid iti ketong, ag-agasan pay ti nasao nga opisina dagiti dadduma a sakit ti kudil kas iti kurad, allergy, gaddil ken dadduma pay.#