VIGAN CITY – Kinuna ti gobernador ditoy probinsia a nasolbaren ti problema ti nakirang nga agas babaen ti pannakaipasdek ti botika ti probinsia ket indagadagna a mapakaammuan no adda dagiti doktor a mangibaga nga awan agas kadagiti district hospitals a pagpapaayanda tapno maipakatanna iti aksion.

Daytoy ti impaganetget ni Gov. Deogracias Victor Savellano bayat ti maysa a taripnong dagiti barangay health workers iti sibubukel a probinsia a naangay ditoy itay nabiit.

Kinuna ti gobernador a nasolbaren ti parikut ti panagkurang ti agas kadagiti ospital ti gobierno kalpasan a naipasdek ti Botika ti Probinsia idi Nobiembre 2009.

“Idawdawatko laeng nga ipakaammoyo dagiti doktor ti gobierno a mangibagbaga nga awan agas tapno aksionantayo a dagus ta agingga ita ket adda pay laeng dagiti saan a sumurot iti sistema a kayattayo tapno sumayaat ti serbisio ti salun-at,” kinuna ni Savellano kadagiti barangay health workers.

Kanaig daytoy, kinuna ti gobernador nga ikkan ti gobierno probinsial amin a barangay health workers iti sibubukel a probinsia ti Ilocos Sur iti libre a a benepisio iti salun-at babaen ti proyekto a Dur-as ken Virtud para iti Benneg ti Salun-at dagiti Ilokano. Iti nasao a proyekto, maikkan iti PhilHealth cards dagiti amin nga indigent a pamilia a pakairamanan metten dagiti amin a BHWs.

Kinuna ni Savellano a maysa daytoy a wagas ti gobierno probinsial tapno pagyamananna dagiti boluntario nga agserserbi para ti pannakataginayon ti salun-at iti barangay.

“Dakayo ti takiag ti turay a mangiwaragawag kadagiti amin a programa para iti salun-at kasta metten a dakayo ti umuna nga asitgan dagiti kabarangayanyo nga addaan sagubanit, isu a rumbeng laeng a maikkankayo met iti benepisio,” kinuna ti gobernador.

Dinawat ti gobernador kadagiti BHWs nga irekomendada kadagiti masakit iti masakupanda nga iprioridadda ti iseserrekda kadagiti district hospitals tapno ma-maximize ti tulong a maited kadakuada.

Inyunay-unay ti gobernador nga apaman a maiserrek iti ospital dagiti masakit nga awanan iti PhilHealth card, dagus a maiyenrol dagitoy tapno saandan nga agparikut iti pagbayadda kasta met a no agkasapulanda pay iti tulong, madadaan ti gobierno probinsial a mangipaay ti nayon a tulong babaen ti programa nga “Aid in Crisis”.

Mausar met latta dagiti BHWs ti death aid/insurance cards nga inwaras ti gobierno probinsial kadakuada uray pay maipaayandan iti PhilHealth cards, segun iti gobernador.#