Aglaklako iti balut, kampeon iti Tour of Ilocos Sur

VIGAN CITY – Aglaklako iti balut ti nagkampeon iti Maikanem a Tour of Ilocos Sur a naangay idi Mayo 30-June 1.

Gapu iti panagkampeonna iti individual category, immawat ni Ryan Serapio ti Team Joyeria iti P20,000 bayat ti seremonia a naangay iti sanguanan ti provincial capitol idi Hunio 1.

Immawat ni Carlo Gazmen, maikadua a puesto, iti P15,000.00, idinto a P10,000.00 ti inyawid ni Edel Yago, maikatlo a puesto.

Iti Team Category, nagkampeon ti Team Henry ket immawat iti P45,000.00; maikadua ti Team Green “R” ket immawat iti P35,000.00 ken maikatlo ti Team 2 Brothers ket inyalatna ti P25,000.00.

Agdagup iti 42 a siklista dagiti nakaturpos iti torneo a nakisalipan dagiti walo a teams.

Tallo ti laps iti daytoy a pasalip: umuna ti Vigan City via Sinait a nagpatingga iti Candon City a nangsaklaw iti 143 a kilometro; maikadua, manipud Candon via Narvacan agingga iti Tagudin (110 kilometers); ken maikatlo manipud tagudin agingga iti Vigan City (95 kilometers).#