Aglaklako iti karne iti Sinait, impangatoda presio ti karne ti baboy

SINAIT, Ilocos Sur –  Simmublat met dagiti meat vendors ditoy nga ili a nangipangato iti presio ti lakoda a karne ti baboy iti baet nga awan ti mapapati ti panangipakaammoda iti konseho ditoy ken saan a naglasat iti public hearing.

Inkalintegan ti maysa nga aglaklako iti karne ditoy a dina kayat ti painaganan  a napilitanda a mangipangato iti presio ti baboy agsipud ta awanen ti magatangda ket no adda man, nagngina metten ti presio ti liveweight a baboy.

Mapapati a P90-95 kada kilo ti panaglako dagiti agtartaraken iti baboy.

Kinunana pay a gapu iti kinakurang ti suplay ti baboy, kapilitan nga agdakiwasda uray adayo a lugar a gumatang iti ilakoda.

Ngem iti pannakiuman kenkuana ti maysa a lokal a reporter iti radio, kinuna ni Mayor Marlon Ines a nakigtot idi maammuanna ti inaramid dagiti meat vendors agsipud ta saan a napakaammuan ti gobierno munisipal ditoy ken saan a naglasat iti public hearing ti pannakaipangato iti presio ti karne ti baboy.

Kinuna ti maysa a makitkitienda a posible nga immapal dagiti aglaklako iti karne ditoy kadagiti meat vendors iti Vigan City agsipud ta napatgan a dagus ti petisionda a mangingato ti presio ti karne ti baboy babaen ti ibaballaet ti opisina ti ehekutibo iti baet a linabsingda ti R.A. 7581 wenno Price Act gapu iti panangipangatoda iti presio ti lakoda a karne ti baboy a di pay naaksionan ti petisionda.

Idi Pebrero 17, impangato dagiti meat vendors ti Vigan City ti presio ti karne ti baboy manipud iti P140 iti P150 iti baet nga awan pay ti pammalubos manipud iti sangguniang panlungsod agsipud ta madama pay la ti panangad-adal iti komite a nakaipaimaanna.

Impangta pay dagiti meat vendors ti saanda a panagparti iti baboy idi dinawat ti konseho ti panangibabada iti presio ti baboy iti dati agingga iti awan pay ti aksion ti sangguniang panlungsod iti petisionda.

Ngem kinuna ni Bise Mayor Franz Ranches a no aramidenda ti kasta, awanton ti kontrol ti konseho no adda agdarum nga umili mainaig iti panangipangatoda iti presio ti lakoda a karne ti baboy nga awan ti pammalubos manipud iti konseho.

Segun iti bise mayor, sagudayen ti  Price Act a saan a mabalin ti automatic increase, ket mabalin a maidarum ti naglabsing ken mapakatan iti penalty a pannakabalud iti saan a nababbaba iti lima a tawen ngem saan a nalablabes iti 15 a tawen wenno mamulta iti saan a nababbaba ngem P5,000 ken saan a lumbes iti P2 milion, depende iti kadagsen ti panaglabsing.

Imbatad pay ni Konsehal Everin Molina nga agdarum no saan nga isubli dagiti meat vendors iti dati ti presio ti lakoda a karne.

Ngem iti miting nga inangay ti opisina ti ehekutibo ken nakipartisiparan dagiti meat vendors, hog raisers, city agriculture office, City Agriculture and Fisheries Council (CAFC), chairman ti komite ti agrikultura, chairman ti komite iti market, napag-aanamongan ti pannakaipangato ti P10 kada kilo ti presio ti karne ti baboy, manipud iti P140 iti P150 kada kilo.

Napagtitinongan pay dagiti sumaganad a presio ti live wiehgt a baboy: 100 kilos and above – P95.00, 90-99 – P93.00, 80-89 – P91.00, 70-79 – P89.00.

Dagiti takong: Class A – P80.00 ken Class B – P70.00. Dagiti nadisgrasia wenno nagsakit – P60.00.

Kinuna ni Ines a kasapulan a maisayangkat ti public hearing ken magna iti konseho ti nasao nga isyo tapno masurot ti umno a proseso ket maprotektaran dagiti meat vendors, hog raisers ken dagiti aggatgatang.#