Footer

Aglangoyen ti I.S.D.A. iti Ilocos Sur (Tuloyna)

“Kalpasan ti tallo a bulan manipud pannakaibulos dagiti lames, maaddaanton dagiti umili iti kanayonan a sapul ta umadu ti makalapanda idinto a bumassit pay ti kaso ti malnutrision ta maaddaan dagiti pamilia iti nasustansia a taraon,” inlawlawag ti gobernador.

Apay ketdin a saan? Communal waters ti pakaibulosan dagiti fingerlings isu nga amin nga umili ket addaan karbengan nga agkalap babaen ti legal a wagas ken kalpasan nga aganaken dagiti naibulos.

Naidumduma daytoy a proyekto, kuna met dagiti kapitan. Iti umuna a panagdengngeg, amangan no agkatawaka ta kasla panagibelleng laeng iti kuarta daytoy. Ngem no la ketdi ta maipakat a nasayaat dagiti mapanday nga ordinansa ken makitinnulong dagiti umili iti implementasion ken pannakasaluad  dagiti naibulos a lames, balligi la ketdi ti resulta ti I.S.D.A.

Idi Enero 13, 2010 binusatandan ti nagibulos iti lames. Mapan a 100,000 a  fingerlings ti imbulos da Gov. Savellano ken dagiti mayor ti lima nga ili a pakaibilangan ti Gregorio del Pilar, San Emilio, Lidlidda, Banayoyo ken San Esteban. Idi Enero 26, umabot met iti 400,000 a fingerlings ti naibulos iti sangapulo ket maysa nga ili iti umuna a distrito ti probinsia a pakairamanan ti Sinait, Cabugao, San Juan, Magsingal, Sto. Domingo, San Ildefonso, Bantay, San Vicente, Sta. Catalina, Caoayan ken Vigan. Nagpintas man a kitaen ti panagpisaw ti danum apaman a rinugian dagiti tilapia ti aglangoy. Saan nga agpatingga dita ti proyekto ta agtultuloy ti panagibulosda kadagiti dadduma pay nga ili.

Deputized Fish Wardens

Maysa nga addang ti inrugi ni Gov. Savellano tapno masaluadan dagiti naibulos a lames. Indagadagna ti panangdutok dagiti kapitan iti maysa a kabarangayanda nga agdalan iti tallo nga aldaw a panagsanay tapno agbalin a deputized fish wardens. Ti gobierno probinsial ti mangibaklay iti gastos ti panagsanay a pakaiyadalan dagiti linteg a kasapulan a maipakat, dagiti rumbeng ken saan nga aramiden kadagiti lames kadagiti kadanuman ken dadduma pay nga impormasion mainaig iti panangsaluad iti kinabaknang ti kadanuman. Dagitoyto ti mapusgan a mangbantay kadagiti naibulos a lames ken mangtiliw iti asinoman nga aglabsing.

Nagdalan met dagiti  kameng ti Army Reservists iti probinsia iti panagsanay ken nagbalinda a fish wardens. Naipakumit kadakuada ti panangtiliwda kadagiti agdinamita tapno masaluadan dagiti coral reefs a taeng dagiti nadumaduma nga ikan. Gapu ta mamati ni Gov. Savellano a nasaysayaat a matiliw dagiti agar-aramid iti dinamita ngem dagiti agus-usar, nangitanggaya ti gobierno probinsial iti P5,000 ti asinoman a makaitudo iti lugar a pagar-aramidan iti dinamita.

“Sakbay a mausar dagiti dinamita iti panagkalap nasaysayaat no maibagan kadagiti kameng ti PNP tapno makumpiska ken matiliw  dagiti agar-aramid,” kinuna ti gobernador.

Rugi pay laeng daytoy ti naidumduma a proyekto ti agrikultura ditoy Ilocos Sur a mabalin a kaunaan pay ketdi iti Pilipinas. Agtultuloy ti panagibulos ti gobierno probinsial kadagiti lames ket addan kadagiti umili a mangannong iti pasetda tapno agpaut ti panaglangoy ti I.S.D.A.#